نیویارک۔ (مرکز اطلاعات فلسطین فاؤنڈیشن ) امریکی ریاست یوٹا میں ہونے والی ایک تقریب کے دوران فائرنگ کے نتیجے میں قابض اسرائیل کے انتہا پسند اور شدت پسند حامی کارکن اور انفلوئنسر چارلی کرک ہلاک ہوگئے۔
امریکی صدر ڈونلڈ ٹرمپ نے بدھ کی شب کرک کی ہلاکت کی تصدیق کرتے ہوئے اسے “افسانوی” قرار دیا۔
امریکی ذرائع ابلاغ کے مطابق 31 سالہ چارلی کرک کو زخمی حالت میں ہسپتال منتقل کیا گیا تاہم وہ زخموں کی تاب نہ لاکر دم توڑ گئے۔
ٹرمپ نے امریکہ بھر میں ایک ہفتے کے لئے سرکاری سطح پر پرچم سرنگوں رکھنے کا اعلان کیا اور کرک کو “قومی ہیرو” قرار دیا۔
ایف بی آئی کے ڈائریکٹر کاش پٹیل نے بتایا کہ کرک کے قتل کے شبہ میں ایک شخص کو گرفتار کیا گیا تھا تاہم ابتدائی تفتیش کے بعد اسے رہا کردیا گیا۔ پٹیل نے کہا کہ تحقیقات ابھی جاری ہیں اور شفافیت کو یقینی بنانے کے لئے تمام معلومات عوام کے سامنے لائی جائیں گی۔
ریاست یوٹا کے گورنر اسپینسر کاکس نے اس واقعے کو “سیاسی قتل” قرار دیا۔ ریاستی حکام کے مطابق حملہ آور نے سیاہ کپڑے پہن رکھے تھے اور اس نے ایک عمارت کی چھت سے دور سے نشانہ بنایا۔
سوشل میڈیا پر وائرل ہونے والی ویڈیوز میں دکھایا گیا ہے کہ چارلی کرک ایک سفید خیمے کے نیچے ہاتھ میں مائیک پکڑ کر خطاب کر رہے تھے کہ اچانک گولی چلنے کی آواز آتی ہے۔ کرک اپنے دائیں ہاتھ کو بلند کرتے ہیں اور ان کی گردن کے بائیں حصے سے تیزی سے خون بہنے لگتا ہے۔ موقع پر موجود افراد میں چیخ و پکار مچ جاتی ہے اور لوگ گھبرا کر بھاگنا شروع کر دیتے ہیں۔
واقعے کے وقت چارلی کرک ایک مباحثے میں شریک تھے اور فائرنگ سے چند لمحے قبل وہ ایک حاضرین کے سوال کا جواب دے رہے تھے جو امریکہ میں بڑھتے ہوئے اجتماعی فائرنگ اور مسلح تشدد کے بارے میں تھا۔
چارلی کرک نے سنہ2012ء میں “ٹورنگ پوائنٹ امریکہ” نامی تنظیم قائم کی تھی جو امریکی جامعات میں دائیں بازو کے خیالات کو پھیلانے اور لبرل سوچ کا مقابلہ کرنے کے لئے سرگرم ہے۔ وہ صدر ڈونلڈ ٹرمپ کے قریبی اور بڑے حامی سمجھے جاتے ہیں اور قابض اسرائیل کے لئے کھلی اور جارحانہ حمایت کے حوالے سے بھی شہرت رکھتے تھے۔
