غزہ (مرکز اطلاعات فلسطین فاؤنڈیشن )غزہ کی پٹی کے قبائلی اتحاد نے ’’گلوبل صمود فلوٹیلا‘‘ کا پُرجوش خیر مقدم کیا اور اس عظیم قافلے کو خراج تحسین پیش کیا جو آزاد انسانوں کی ہمت اور عزیمت کے ساتھ ناکہ بندی توڑنے اور دنیا کو یہ پیغام دینے کے لیے رواں دواں ہے کہ غزہ تنہا نہیں۔
قبائلی اتحاد نے اپنے بیان میں کہا کہ غزہ کے باسیوں کے گھر اور ان کے خیمے اس قافلے کے مرد و خواتین مجاہدینِ آزادی کے لیے کھلے ہیں اور ہمارا عوام انہیں دل سے پہلے اپنے ہاتھوں سے خوش آمدید کہے گا، جیسے پہلے آنے والے دنیا کے آزاد کارواں کو خوش آمدید کہا تھا۔
بیان میں کہا گیا کہ یہ عظیم قدم ہر اس فلسطینی بچے اور عورت کے لیے امید کی کرن ہے جو غزہ میں جلتی بھٹیوں کی طرح انتظار کر رہے ہیں۔ یہ بیڑا انہیں حوصلہ دیتا ہے اور اس بات کی گواہی ہے کہ ان کی پکار دنیا کے آزاد ضمیروں تک پہنچ چکی ہے۔
اتحاد نے عوام سے اپیل کی کہ وہ اس قافلے کے پیچھے ایک صف میں ڈٹ کر کھڑے ہوں اور ان بھائیوں کے لیے گہرے شکریے اور قدردانی کا اظہار کریں جنہوں نے فرض اور انسانیت کی پکار پر لبیک کہا ہے۔
اسطول صمود عالمی ایک بڑی شہری اور عوامی تحریک بن کر ابھرا ہے جو سمندر کے راستے فلسطینیوں کی نصرت اور برسوں سے مسلط ناکہ بندی کو توڑنے کے لیے نکلا ہے۔ اس نے مختلف قومیتوں کے کارکنوں کو اکٹھا کیا ہے اور ایک عالمی انسانی بیانیہ تخلیق کیا ہے جو اس جاری تباہی پر عالمی سیاسی بے حسی کو للکار رہا ہے۔
جمعرات کے روز یہ بیڑا امدادی سامان اور انسانی حقوق کے کارکنوں کے ہمراہ قابض اسرائیل کی ناکہ بندی کو توڑنے کی نیت سے اپنی روانگی جاری رکھے ہوئے ہے۔
یہ جہاز مشرقی بحیرہ روم میں ایک چھوٹے جزیرے کے قریب دوبارہ جمع ہوئے تاکہ بین الاقوامی پانیوں کی طرف بڑھ سکیں جو اطالوی سمندری حدود کے قریب ہیں۔ وہاں مزید جہاز شامل ہونے والے ہیں جو کئی ٹن امدادی سامان کے ساتھ درجنوں کارکنوں کو لے کر آئیں گے۔
