غزہ ۔ (مرکز اطلاعات فلسطین فاؤنڈیشن ) غزہ میں حکومت کے میڈیا آفس نے کہا ہے کہ قابض اسرائیل نے خان یونس میں ناصر طبی کمپلیکس پر شدید اور جان بوجھ کر بمباری کی، جس کے نتیجے میں 22 شہری شہید ہوئے، جن میں ڈاکٹرز، صحافی اور سول ڈیفنس اہلکار شامل ہیں، جبکہ درجنوں افراد شدید زخمی ہوئے۔
بیان میں کہا گیا کہ قابض اسرائیل نے اس وحشیانہ حملے کے بعد اسے جواز فراہم کرنے کے لیے ایک جھوٹی کہانی گھڑی، جس میں دعویٰ کیا گیا کہ حملہ ایک مزاحمتی کیمرے کو نشانہ بنانے کے لیے کیا گیا تھا۔ حالانکہ حقیقت یہ ہے کہ یہ کیمرہ رائٹرز ایجنسی کے فوٹو جرنلسٹ حسام المصری کا تھا، جو پہلی بمباری میں شہید ہوگئے۔
بیان میں مزید کہا گیا کہ دوسری بمباری میں براہِ راست ریسکیو ٹیموں اور صحافیوں کو نشانہ بنایا گیا، جسے بین الاقوامی سطح پر “ڈبل اسٹرائیک” کے نام سے ممنوعہ حکمتِ عملی کے طور پر جانا جاتا ہے، اور اس کا مقصد زیادہ سے زیادہ شہری نقصان پہنچانا تھا۔
میڈیا آفس نے یہ بھی بتایا کہ قابض اسرائیل نے شہداء کی شناخت میں جعلسازی کی اور چھ شہداء کو “تخریب کار” قرار دے کر فہرست میں شامل کیا، حالانکہ بعض شہداء مختلف مقامات یا پہلے کے حملوں میں شہید ہو چکے تھے۔ باقی شہداء واضح طور پر شہری، طبی عملے، امدادی کارکنوں اور صحافیوں پر مشتمل تھے۔
میڈیا آفس نے زور دے کر کہا کہ یہ جرم جنیوا کنونشنز اور بین الاقوامی انسانی قانون کی کھلی خلاف ورزی ہے اور اسے “جنگی جرم اور انسانیت کے خلاف جرم” قرار دیا جانا چاہیے۔
بیان میں عالمی برادری، اقوام متحدہ اور بین الاقوامی فوجداری عدالت سے مطالبہ کیا گیا کہ اس واقعے کو دستاویزی شکل دی جائے اور ذمہ داروں کو انصاف کے کٹہرے میں لایا جائے۔
واضح رہے کہ 7 اکتوبر 2023ء سے قابض اسرائیل، امریکہ اور مغربی ممالک کی حمایت کے ساتھ غزہ میں ایک تباہ کن جنگ جاری رکھے ہوئے ہے، جس کے نتیجے میں اب تک تقریباً 2 لاکھ 21 ہزار فلسطینی شہید یا زخمی ہو چکے ہیں
