صنعا —(مرکز اطلاعات فلسطین فاؤنڈیشن) یمن کی انصار اللہ تحریک کے قائد عبدالملک الحوثی نے مظلوم فلسطینی قوم پر جاری بدترین مظالم اور بے رحم نسل کشی کو قابض اسرائیل کی ایک منظم اور سوچے سمجھے منصوبے کا شاخسانہ قرار دیا ہے۔ ان کا کہنا تھا کہ غزہ میں جو کچھ ہو رہا ہے وہ ایسی نسل کشی ہے جو روزانہ جرم کی صورت میں انجام دی جا رہی ہے۔
انہوں نے ایک اہم خطاب میں کہا کہ قابض اسرائیل نے فلسطینی خاندانوں کو مکمل طور پر صفحۂ ہستی سے مٹا دیا ہے، یہاں تک کہ ان کے نام شہری ریکارڈ سے بھی حذف کر دیے گئے۔ یہ کوئی معمولی حملہ نہیں بلکہ ایسا جارحانہ طوفان ہے جس کا آغاز امریکہ سے ہوتا ہے اور اسرائیل محض اس منصوبے کا ایک مجرمانہ ہتھکنڈہ ہے۔
عبدالملک الحوثی نے واضح کیا کہ امریکہ فلسطینیوں کی نسل کشی میں نہ صرف سیاسی اور سفارتی پردہ فراہم کر رہا ہے بلکہ عسکری، انٹیلی جنس اور منصوبہ بندی کے میدان میں بھی کلیدی کردار ادا کر رہا ہے۔ انہوں نے لبنان، شام اور دیگر عرب ممالک پر حملوں میں امریکہ کی شمولیت کو اجاگر کرتے ہوئے کہا کہ یہ ایک وسیع تر سازش ہے جس کا ہدف صرف فلسطین نہیں بلکہ پوری امت مسلمہ ہے۔
انہوں نے افسوس کا اظہار کرتے ہوئے کہا کہ آج مسجد اقصیٰ کی حرمت کی پامالی روزمرہ کا معمول بن چکی ہے اور امت مسلمہ کے بڑے طبقے کے لیے یہ مناظر اب غیر معمولی نہیں رہے۔ یہ ایک نہایت خطرناک صورت حال ہے جو امت کی بے حسی اور کمزوری کو بے نقاب کرتی ہے۔
ان کا کہنا تھا کہ قابض اسرائیل کی جانب سے مسجد ابراہیمی کو یہودیت میں ڈھالنے کی کوششیں جاری ہیں۔ حالیہ اقدام میں صہیونی انتظامیہ نے مسجد ابراہیمی سے متعلق تمام اختیارات الخلیل کی بلدیہ سے چھین لیے ہیں۔ صہیونی منصوبے کے تحت مغربی کنارے کے شہروں اور قصبوں کو ایک دوسرے سے کاٹ کر فلسطینی وجود کو ٹکڑوں میں تقسیم کیا جا رہا ہے۔
انہوں نے فلسطینی اتھارٹی اور ان عرب حکومتوں کو بھی سخت تنقید کا نشانہ بنایا جو قابض اسرائیل سے تعلقات معمول پر لانے کے فریب میں مبتلا ہیں۔ ان کا کہنا تھا کہ وقت نے ثابت کر دیا ہے کہ یہ راستہ ناکامی، ذلت اور بے بسی کے سوا کچھ نہیں لاتا۔
عبدالملک الحوثی نے غزہ میں فلسطینی مجاہدین کی بہادری کو سراہتے ہوئے کہا کہ وہ قابض دشمن کو بھاری جانی و مالی نقصان پہنچا رہے ہیں اور منصوبہ بندی، حکمت عملی اور عمل درآمد میں غیرمعمولی مہارت کا مظاہرہ کر رہے ہیں۔
انہوں نے القسام کے شہید کمانڈر محمد الضیف کو خراجِ عقیدت پیش کرتے ہوئے کہا کہ وہ فلسطین میں جہاد کے روشن مینار تھے۔ ان کا کردار قربانی، قیادت، ایمان اور جہاد کے سفر کا زندہ اور روشن نمونہ ہے۔ ان کے ساتھیوں نے دنیا کو بتا دیا کہ ایمان کی روشنی میں کیسی کامیاب مزاحمت جنم لیتی ہے۔
عبدالملک الحوثی نے زور دیا کہ پوری امت مسلمہ کو فلسطینی کاز، خاص طور پر غزہ کے ساتھ کھڑا ہونا چاہیے۔ انہوں نے کہا کہ فلسطین کے خلاف صہیونی و امریکی منصوبے کو ناکام بنانے کے لیے سنجیدہ، مربوط اور عملی اقدامات کی فوری ضرورت ہے۔
