غزہ – (مرکز اطلاعات فلسطین فاؤنڈیشن) غزہ کی مظلوم سرزمین ایک بار پھر خون میں نہلا دی گئی۔ قابض اسرائیلی فوج کی وحشیانہ بمباری اور درندگی کے نتیجے میں گزشتہ 24 گھنٹوں کے دوران 82 فلسطینی شہید اور 247 شدید زخمی ہو چکے ہیں۔ یہ اندوہناک اعداد و شمار غزہ کی وزارتِ صحت کی روزانہ کی رپورٹ میں سامنے آئے۔
وزارت کے مطابق درجنوں لاشیں اب بھی ملبے تلے اور سڑکوں پر پڑی ہیں۔ ریسکیو ٹیمیں اور ایمبولینسیں اسرائیلی بمباری، محاصرے اور رکاوٹوں کے باعث ان مقامات تک پہنچنے سے قاصر ہیں۔ یہ وہ معصوم جانیں ہیں جو شاید کبھی سرکاری اعداد و شمار میں شمار نہ ہو سکیں، مگر غزہ کی ہر گلی، ہر دیوار اور ہر آہ ان کے لہو کی گواہ بن چکی ہے۔
رپورٹ کے مطابق 7 اکتوبر 2023ء سے شروع ہونے والی اس ہولناک جنگ میں اب تک 57,762 فلسطینی شہید ہو چکے ہیں، جبکہ 137,656 زخمی مختلف اسپتالوں میں زیرِ علاج ہیں۔ ان میں وہ بچے، عورتیں اور بزرگ بھی شامل ہیں جو صرف اس لیے نشانہ بنے کہ وہ فلسطینی تھے، اپنی سرزمین سے محبت کرتے تھے، اور غلامی کو قبول کرنے سے انکار کر چکے تھے۔
وزارتِ صحت کا کہنا ہے کہ 18 مارچ 2025ء کو اسرائیل کی جانب سے عارضی جنگ بندی کی خلاف ورزی کے بعد سے اب تک 7,200 فلسطینی شہید اور 25,615 زخمی ہو چکے ہیں۔ یہ تعداد ہر دن، ہر لمحہ بڑھ رہی ہے، مگر دنیا کا ضمیر بدستور خاموشی کی چادر اوڑھے بیٹھا ہے۔
مزید یہ بھی بتایا گیا کہ پچھلے 24 گھنٹوں میں اسرائیلی بمباری کا نشانہ بننے والے فلسطینیوں میں 9 شہداء اور 78 زخمی وہ تھے جو انسانی امداد کے حصول کی کوشش میں مارے گئے۔ اس طرح امداد کی تلاش میں شہید ہونے والوں کی مجموعی تعداد 782 ہو چکی ہے — وہ افراد جو بھوک مٹانے نکلے تھے، مگر کفن پہن کر واپس آئے۔
قابض اسرائیل کی یہ بدترین جنگی درندگی اور نسل کشی کی مہم جاری ہے۔ مہاجر کیمپ، پناہ گزین مراکز، گھروں کے صحن، ہسپتالوں کے بستر — سب کچھ اس جارحیت کی زد میں ہے۔
غزہ میں ہر لمحہ ایک نئی لاش، ہر گھنٹہ ایک نیا جنازہ، اور ہر دن ایک نیا اجتماعی قبرستان وجود میں آ رہا ہے۔
