صنعاء (مرکز اطلاعات فلسطین فاؤنڈیشن) یمنی مزاحمتی تنظیم انصار اللہ نےاعلان کیا ہے کہ اس نے بحرِ احمر میں ایک ایسی تجارتی کشتی کو نشانہ بنایا ہے جو قابض اسرائیل کی بندرگاہوں میں لنگراندازی کے خلاف عائد کردہ پابندی کی خلاف ورزی کی مرتکب ہوئی۔
جماعت کے عسکری ترجمان یحییٰ سریع نے بتایا کہ یمنی مسلح افواج کی بحریہ، میزائل فورس اور ڈرون فورس نے مل کر “ماجک سیز” نامی کشتی کو نشانہ بنایا، جو ایک ایسی کمپنی کی ملکیت ہے جو قابض اسرائیل کے ساتھ کاروباری تعلقات رکھتی ہے۔ اس حملے میں دو ڈرون کشتیوں، پانچ بیلسٹک اور کروز میزائلوں اور تین ڈرون طیاروں کا استعمال کیا گیا۔
یحییٰ سریع کے مطابق، اس حملے کے نتیجے میں کشتی کو براہ راست نقصان پہنچا، اس میں پانی داخل ہونا شروع ہو گیا اور اب یہ کشتی غرقاب ہونے کے قریب ہے۔ انہوں نے وضاحت کی کہ یمنی افواج نے انسانی ہمدردی کے تحت عملے کو بحفاظت کشتی سے نکلنے کی اجازت دی۔
انہوں نے مزید بتایا کہ یہ کارروائی کشتی کے عملے کو بارہا انتباہات دینے کے بعد کی گئی، جنہیں نظر انداز کر دیا گیا تھا۔ انہوں نے تاکید کی کہ یمنی مسلح افواج اس کمپنی سے وابستہ کسی بھی کشتی کو نشانہ بنانے سے گریز نہیں کریں گی، کیونکہ اس کمپنی نے قابض اسرائیل سے تعلقات قائم کر کے فلسطینی عوام کے خلاف اس کے جرائم میں معاونت کی ہے۔
یحییٰ سریع نے کہا کہ جو کوئی بھی قابض اسرائیل کی بندرگاہوں کی طرف جاتا ہے، وہ یمنی حملوں کا جائز ہدف ہے اور وہ اپنی اس حرکت کی مکمل ذمہ داری خود اٹھائے گا۔ انہوں نے کہا کہ “ہم نے خبردار کر دیا، اب کوئی عذر باقی نہیں۔”
انہوں نے ایک بار پھر واضح کیا کہ یمنی افواج کی جانب سے قابض اسرائیل کے اندر گہرائی میں حملے، بحرِ احمر اور بحرِ عرب میں اسرائیلی جہاز رانی کی روک تھام اور ام الرشراش (ایلات) بندرگاہ کی بندش اس وقت تک جاری رہے گی جب تک غزہ پر مسلط کی گئی جنگ کا خاتمہ نہیں ہو جاتا اور وہاں سے محاصرہ مکمل طور پر نہیں ہٹا لیا جاتا۔
آج صبح بھی انصار اللہ نے ایک اور بڑی عسکری کارروائی کا اعلان کیا جس میں 11 میزائلوں اور ڈرون طیاروں کا استعمال کیا گیا۔ اس حملے میں بن گوریون ایئرپورٹ، اسدود بندرگاہ، عسقلان کے بجلی گھر اور ایلات بندرگاہ کو نشانہ بنایا گیا۔ بن گوریون، اسدود اور عسقلان پر بیلسٹک ہائپرسونک میزائل داغے گئے جبکہ ایلات بندرگاہ پر 8 ڈرون طیارے برسائے گئے۔
یہ تمام کارروائیاں قابض اسرائیل کے اس تازہ حملے کے بعد کی گئی ہیں جس میں اس نے یمن کے الحُدیدہ، راس عیسیٰ، الصلیف اور کتیب بجلی گھر جیسے حساس علاقوں کو نشانہ بنایا۔ ان حملوں کو قابض اسرائیل نے “سیاہ پرچم” کے نام سے موسوم فوجی کارروائی کا حصہ قرار دیا ہے۔
