مقبوضہ بیت المقدس (مرکزاطلاعات فلسطین فاؤنڈیشن) جمعرات کی صبح ایک بار پھر یہودی شرپسندوں نے مسجد اقصیٰ میں گھس کر اس کی بے حرمتی کی۔ قابض اسرائیل کے زیرسایہ صہیونی شدت پسندوں کے جتھوں نے سخت سکیورٹی پہرے میں قبلۂ اول کی حرمت کو پامال کرتے ہوئے اس مقدس مقام پر دھاوا بولا۔
مرکزاطلاعات فلسطین کو موصول ہونے والی اطلاعات کے مطابق درجنوں انتہا پسند صہیونی گروہ جمعرات کی صبح مسجد اقصیٰ کے صحن میں داخل ہوئے اور اس مقدس مقام کو اپنی اشتعال انگیز حرکات کا نشانہ بنایا۔ انہوں نے مسجد کی مشرقی سمت میں تلمودی رسومات ادا کیں، جن کا مقصد واضح طور پر مسلمانوں کے جذبات کو ٹھیس پہنچانا اور قبلۂ اول کی حیثیت کو چیلنج کرنا تھا۔
ان غاصبانہ اقدامات کے دوران قابض اسرائیلی پولیس نے فلسطینی نمازیوں پر سخت ترین پابندیاں عائد کر دیں۔ کئی نمازیوں کو مسجد میں داخل ہونے سے روک دیا گیا، جب کہ متعدد کے شناختی کارڈ دروازوں پر ضبط کر لیے گئے۔ یہ ظلم اس وقت روا رکھا گیا جب فلسطینی مسلمانوں کی بڑی تعداد فجر کے بعد مسجد اقصیٰ میں عبادت کے لیے پہنچی تھی۔
یہ پہلا موقع نہیں جب مسجد اقصیٰ، جو صرف فلسطینیوں ہی نہیں بلکہ تمام مسلمانوں کے لیے ایک مقدس ترین مقام ہے، قابض اسرائیل کی جارحیت کا شکار بنی ہو۔ آئے روز اس مسجد کی حرمت کو چیلنج کیا جاتا ہے اور اسلامی دنیا خاموش تماشائی بنی بیٹھی ہے۔
ایسے عالم میں جب قابض اسرائیل اور اس کے حمایت یافتہ انتہا پسند فلسطینی قوم کی روح، ان کے مقدس مقامات اور ان کی شناخت پر مسلسل حملے کر رہے ہیں، فلسطینی عوام، علماء اور مزاحمتی قوتوں کی جانب سے بار بار یہ اپیل کی جا رہی ہے کہ تمام مسلمانان عالم مسجد اقصیٰ کی حفاظت کے لیے کمربستہ ہوں اور اس مقدس مقام سے رشتہ جوڑے رکھیں۔
