غزہ (مرکزاطلاعات فلسطین فاؤنڈیشن) قابض اسرائیل کی درندگی اور غزہ میں نہ رکنے والے قتل عام کے خلاف دنیا کے کئی شہروں میں انسانیت کے ضمیر نے آواز بلند کی۔ اتوار کے روز سوئیڈن، اٹلی، ہالینڈ اور دیگر یورپی ممالک میں ہزاروں افراد سڑکوں پر نکل آئے۔ ان کے ہاتھوں میں فلسطینی پرچم تھے، آنکھوں میں آنسو اور دلوں میں درد، جو مظلوم فلسطینی قوم کے ساتھ یکجہتی کا پیغام دے رہا تھا۔
سوئیڈن کے شہر مالمو، اٹلی کے شہر لودی، ہالینڈ کے شہر دی ہیگ اور دارالحکومت ایمسٹرڈیم میں ہونے والے مظاہروں میں لوگوں نے واضح الفاظ میں عالمی ضمیر کو جھنجھوڑتے ہوئے مطالبہ کیا کہ غزہ پر بمباری فوراً روکی جائے اور انسانی امداد فوری طور پر داخل کی جائے۔
مظاہرین نے ہاتھوں میں بینرز اٹھا رکھے تھے جن پر قابض اسرائیل کے مظالم کے خلاف نعرے درج تھے، جن میں معصوم بچوں کے خون سے لکھی گئی تحریریں چیخ چیخ کر دنیا کو بتا رہی تھیں کہ انسانیت غزہ میں دم توڑ رہی ہے۔
مظاہرین نے عالمی برادری کی منافقت پر بھی شدید احتجاج کیا، دوہرے معیاروں کو ختم کرنے اور قابض اسرائیل کو اس کے جرائم پر انصاف کے کٹہرے میں لانے کا مطالبہ کیا۔ ان کا کہنا تھا کہ اگر کسی اور قوم کے ساتھ ایسا ہوتا تو پوری دنیا چیخ اٹھتی، مگر فلسطینی بچوں کا خون شاید اتنا قیمتی نہیں سمجھا جا رہا۔
مظاہرین نے زور دے کر کہا کہ قابض اسرائیل کی جانب سے غزہ میں جاری نسل کشی کسی صورت برداشت نہیں کی جا سکتی، اور عالمی اداروں کو اپنی خاموشی توڑ کر فوری اقدام کرنا ہوگا۔
