غزہ(مرکزاطلاعات فلسطین فاؤنڈیشن) اسلامی تحریک مزاحمت’حماس‘ نے برادر جمہوریہ یمن کی الحدیدہ گورنری میں راس عیسیٰ آئل پورٹ پر وحشیانہ امریکی بمباری کی شدید الفاظ میں مذمت کی ہے جس کے نتیجے میں پیرامیڈیکس اور بندرگاہ کے کارکنوں سمیت درجنوں عام شہری شہید اور زخمی ہوئے ہیں۔
حماس نے جمعے کے روز ایک اخباری بیان میں کہا کہ یہ وحشیانہ جارحیت یمن کی خودمختاری کی کھلی خلاف ورزی، ایک مکمل جنگی جرم اور خطے میں صیہونی اور امریکی تسلط اور آزاد لوگوں کو نشانہ بنانے والی جارحانہ امریکی پالیسیوں کے تسلسل کی تصدیق کرتی ہے۔
انہوں نے مزید کہا کہ یمنی عوام کے خلاف امریکی جارحیت غزہ کی پٹی میں ہمارے فلسطینی عوام کے خلاف شروع کی جانے والی تباہی کی جنگ اور ہماری قوم کے عوام کے خلاف امریکی صیہونی مشترکہ جارحیت کی توسیع ہے۔
حماس نے عالمی فوڈ پروگرام کی جانب سے یمن میں فضائی حملوں کا نشانہ بنائے جانے والے علاقوں میں خوراک کی ترسیل کی معطلی کی شدید مذمت کی، جس سے جاری جارحیت اور ناکہ بندی کے تحت یمنی عوام کی مشکلات میں مزید اضافہ ہوا ہے۔
اس نے یمنی عوام کے خلاف جارحیت کے حوالے سے بین الاقوامی خاموشی کی بھی شدید مذمت کی۔ بیان میں کہا کہ یمنی عوام اپنے اصولوں پر قائم رہنے اور فلسطینی کاز کی حمایت کی قیمت چکا رہے ہیں۔
حماس نے برادر یمنی عوام کے ساتھ مکمل یکجہتی کا اظہار کرتے ہوئے فلسطینی کاز پر ان کے جرأت مندانہ اور حمایتی موقف کے ساتھ ساتھ فلسطینی عوام کی حمایت اور غزہ کی پٹی میں ان کی مزاحمت میں مخلص انصار اللہ کے موقف کو سراہا۔ حماس نے غزہ کی پٹی کے خلاف صیہونی جارحیت بند ہونے تک یمنی عوام کی حمایت جاری رکھنے کے عزم کا بھی اعادہ کیا۔
انہوں نے امریکی جارحیت کا مقابلہ کرنے میں یمنی عوام اور ان کی مسلح افواج کے استقامت کو بھی سراہا اور عالمی برادری ،انسانی حقوق اور عالمی تنظیموں سے مطالبہ کیا کہ وہ اس صریح جارحیت کی مذمت کریں اور اپنی سرزمین اور خودمختاری کے دفاع کے ان کے جائز حق میں یمنی عوام کے ساتھ کھڑے ہوں۔
جمعرات کی شام مغربی صوبے الحدیدہ میں راس عیسیٰ آئل پورٹ پر امریکی فضائی حملوں میں اڑتیس یمنی شہید اور درجنوں زخمی ہو گئے۔
یمنی میڈیا نے اطلاع دی ہے کہ مغربی یمن کے الحدیدہ میں واقع راس عیسیٰ آئل پورٹ پر امریکی جارحیت کے ساتھ یکے بعد دیگرے فضائی حملوں میں 38 افراد شہید اور 100 سے زائد زخمی ہوئے۔
