اسلام آباد (مرکزاطلاعات فلسطین فاؤنڈیشن) جمعیت علمائے اسلام کےسربراہ مولانا فضل الرحمان نے کہا ہے کہ اسرائیلی جارحیت کیخلاف فلسطینیوں کا ساتھ دینا مسلمانوں پر فرض ہے، ہم اپنے فلسطینی بھائیوں کے شانہ بشانہ کھڑے ہیں۔
قومی فلسطین کانفرنس سے خطاب کرتے ہوئے مولانا فضل الرحمان کا کہنا تھا کہ غزہ میں بربریت کا سلسلہ جاری ہے، آج کا اجتماع ایک روایتی قسم کا اجتماع نہیں ہے، تاریخ اس اجتماع کو نظرانداز نہیں کر سکے گی۔
مولانا فضل الرحمان نے کہا کہ کانفرنس کا اعلامیہ پوری امت مسلمہ کے لیے ہے، اسرائیل ایک ریاستی دہشت گرد ہے، اسرائیل کی تاریخ قتل و غارت سے بھری پڑی ہے، فلسطین کے معاملے پر پوری قوم متحد ہے۔
انہوں نے کہا کہ نہتے فلسطینیوں پر ظلم و ستم کی تاریخ میں مثال نہیں ملتی، اسرائیل ایک دہشت گرد ریاست ہے، دنیا کو پیغام ہے پاکستان فلسطینی بھائیوں کے شانہ بشانہ ہے۔
مولانا فضل الرحمان نے کہا کہ ہمارے ملک کے فلاسفر کہتے ہیں اسرائیل کے ساتھ تعلقات بہتر نہ کیے تو معیشت کیسے چلے گی، ڈرنا کیا ہے؟ پاکستان کا اسرائیل سے متعلق موقف واضح ہونا چاہیے۔
سربراہ جے یو آئی کا کہنا تھا کہ مشرف نے کہا آپ امریکا کےخلاف جلوس نکالتے ہیں، مجھے مشرف نے کہا مان لو ہم امریکا کے غلام ہیں۔
