غزہ (مرکزاطلاعات فلسطین فاؤنڈیشن) غزہ کی پٹی میں فلسطینی وزارت صحت نے اعلان کیا ہے کہ گذشتہ 24 گھنٹوں کے دوران غزہ کے ہسپتالوں میں 35 شہداء کی لاشیں اور 10 زخمی لائے گئے۔
وزارت صحت نے ایک پریس بیان میں کہاکہ شہداء میں سے 30 کی لاشیں ،ملبے سے برآمد کی گئیں۔ ایک فلسطینی زخموں کی تاب نہ لاتے ہوئے چل بسا، جب کہ اسرائیلی دہشت گردی میں مزید چار فلسطینی شہید ہوگئے۔
وزارت صحت نے بتایا کہ ملبے کے نیچے اور سڑکوں پر اب بھی متعدد متاثرین موجود ہیں اور ایمبولینس اور شہری دفاع کا عملہ ان تک نہیں پہنچ سکتا۔
انہوں نے نشاندہی کی کہ 7 اکتوبر 2023ء سے اب تک اسرائیلی جارحیت کے نتیجے شہید ہونے والوں کی تعداد 48,440 اور زخمیوں کی تعداد 111,845 ہو چکی ہے۔
انہوں نے غزہ کی جنگ میں شہید اور لاپتہ ہونے والے افراد کے اہل خانہ سے مطالبہ کیا کہ وہ منسلک لنک کے ذریعے رجسٹریشن کروا کر تمام ڈیٹا وزارت صحت کے ریکارڈ کے ذریعے مکمل کریں۔
