نیو یارک (مرکزاطلاعات فلسطین فاؤنڈیشن) فلسطین امریکن آرگنائزیشن نیٹ ورک جو امریکہ میں 35 فلسطینی امریکی تنظیموں کی نمائندگی کرتا ہے،نے صدر ٹرمپ کی غزہ سے فلسطینیوں کو مصر اور اردن میں آباد کرنے کی تجویز کو واضح طور پر مسترد کر دیا ہے۔
تنظیموں نے ایک بیان میں کہا کہ یہ تجویز جبری نقل مکانی کی کوشش کے مترادف ہے جسے اسرائیل 7 اکتوبر 2023 کو غزہ پر جنگ کے آغاز کے بعد سے 15 ماہ کی نسل کشی اور نسلی تطہیر کے دوران حاصل کرنے میں ناکام رہا ہے۔
“ایسا لگتا ہے کہ صدر ٹرمپ نہیں جانتے کہ غزہ کی 70 فیصد آبادی پناہ گزین ہیں جنہیں 1948 میں اور اس کے بعد ان کے اصل شہروں جیسے یافا، حیفا،
عسقلان ، اشدود، بیر سبع اور دوسرے مقامات سے زبردستی بے دخل کیا گیا تھا۔ یہ علاقے اب صہیونی ریاست کے تسلط میں ہیں۔
تنظیموں نے ایک یادداشت میں کہا کہ اگر صدر ٹرمپ مشرق وسطیٰ میں امن کے حصول کے لیے سنجیدہ ہیں، جیسا کہ وہ دعویٰ کرتے ہیں، تو انھیں مغربی کنارے، غزہ کی پٹی اور مشرقی یروشلم پر قابض اسرائیلی قبضے کو ختم کرنے کے لیے سنجیدگی سے کام کرنا چاہیے، جس پر 1967ء میں قبضہ کیا گیا تھا۔
گذشتہ ہفتے کے روز امریکی صدر ڈونلڈ ٹرمپ نے صحافیوں کو بیان دیتے ہوئے غزہ کی پٹی کے فلسطینیوں کو مصر اور اردن جیسے پڑوسی ممالک میں منتقل کرنے کا مطالبہ کرتے ہوئے کہا کہ غزہ کی پٹی میں رہائش کے قابل جگہ نہیں۔
