اسلام آباد (مرکزاطلاعات فلسطین فاؤنڈیشن) وزیر اعظم پاکستان محمد شہباز شریف نے غزہ میں جاری جارحیت کو ایک ناقابلِ قبول المیہ قرار دیتے ہوئے عالمی برادری سے فوری کارروائی کا مطالبہ کیا ہے۔
شنگھائی تعاون تنظیم کی اختتامی تقریب میں خطاب کرتے ہوئے انہوں نے واضح کیا کہ ہم غزہ میں ہونے والی نسل کشی کو نظر انداز نہیں کر سکتے اور بین الاقوامی طاقتوں کو اس تباہ کن صورتحال کو ختم کرنے کے لیے اپنا کردار ادا کرنا ہو گا۔
وزیر اعظم نے مزید کہا کہ فلسطین میں فوری جنگ بندی کی ضرورت ہے تاکہ معصوم جانیں بچائی جا سکیں اور اس خطے میں پائیدار امن قائم کیا جا سکے۔ انہوں نے اس بات پر زور دیا کہ عالمی برادری کو فلسطینی عوام کے حقوق کے تحفظ کے لیے مؤثر اقدامات اٹھانے ہوں گے۔
اس اہم پیغام کے ذریعے وزیر اعظم نے نہ صرف فلسطینیوں کے ساتھ یکجہتی کا اظہار کیا بلکہ عالمی قیادت کو ان کے اخلاقی فرائض کی یاد دہانی بھی کرائی۔
