رام اللہ –فلسطین فائونڈیشن پاکستان
مقبوضہ فلسطین کے مرکز تل ابیب کے وسط میں اتوار کو ایک ٹرک میں دھماکے کے نتیجے میں ایک اسرائیلی آباد کار ہلاک ہو گیا۔ قابض فوج کا کہنا ہے کہ وہ اس واقعے کے پس منظر کی تحقیقات کر رہے ہیں کہ آیا یہ دھماکہ کسی مجرمانہ کارروائی کا حصہ تھا یا نہیں۔
عبرانی چینل 13 نے اس حوالے سے بتایا کہ اسرائیلی پولیس اور شین بیت دھماکے کی تحقیقات کر رہے ہیں تاکہ معلوم کیا جا سکے کہ آیا یہ مجرمانہ حملہ تھا یا نہیں۔
عبرانی چینل 7 کی ویب سائٹ پر شائع ایک خبر میں بتایا گیا ہے کہ اسرائیلی پولیس یہ مسترد نہیں کرتی کہ تل ابیب میں ٹرک دھماکے کے پیچھے قوم پرستانہ مقاصد ہو سکتے ہیں۔
اسرائیلی پولیس نے تل ابیب میں بار لیو اسٹریٹ کو بند کر دیا ہے اور دھماکے کی جگہ اور جائے وقوعہ سے شواہد اکٹھے کرنے کے بعد تحقیقات کا آغاز کر دیا ہے۔
“عرب 48” ویب سائٹ، جو اسرائیلی امور پر نظر رکھتی ہے، نے وضاحت کی کہ اتوار کی شام تل ابیب میں ایک ٹرک دھماکے کے نتیجے میں ایک 50 سالہ شخص ہلاک ہو گیا۔ ہلاک ہونے والے شخص کی مزید تفصیلات سامنے نہیں آئی ہیں۔
اسی ذریعے کے مطابق، ایمبولینس کا عملہ جائے وقوعہ پر پہنچا اور شدید چوٹ کی وجہ سے وہاں موجود شخص کو فوری طور پر مردہ قرار دے دیا گیا۔
