بیروت – فلسطین فائونڈیشن پاکستان لبنان کی سرکردہ مزاحمتی تنظیم حزب اللہ نے ڈرون طیاروں کے ذریعے شمالی اسرائیل میں واقع چھاؤنی “ایلیت” میں نائنٹی فرسٹ (91) ڈویژن کی کمان کو نشانہ بنایا ہے۔
حزب اللہ کی جانب سے پیر کی صبح جاری بیان میں مزید کہا گیا ہے کہ “ڈرون طیاروں کے ذریعے ہونے والے اس حملے میں متعدد فوجی اہل کار ہلاک اور زخمی ہوئے ہیں۔”
دوسری جانب اسرائیلی میڈیا نے بتایا ہے کہ لبنان کی سمت سے آنے والا ایک ڈرون طیارہ شمالی اسرائیل کے علاقے “ایلیت حشار” میں دھماکے سے تباہ ہو گیا۔ اس سے قبل اس ڈرون نے وہاں ایک فوجی اڈے کو نقصان پہنچایا تھا۔ حملے میں دو اسرائیلی فوجی اہل کار زخمی ہو گئے، جن میں سے ایک کی حالت تشویش ناک ہے۔
اسرائیلی فوجی ریڈیو کے مطابق شمالی اسرائیل میں کریات شمونہ اور کئی دیگر قصبوں میں ڈرون طیاروں کی دراندازی کے اندیشے کے سبب خطرے کے سائرن بجا دیے گئے۔ اسی طرح اسرائیلی فوج نے بتایا کہ شمالی اسرائیل کے علاقے “ایلیت حشار” میں بھی یہ سائرن بجائے گئے۔
بدھ کے روز ایرانی دار الحکومت تہران میں فلسطین کی مزاحمتی تحریک حماس کے سیاسی دفتر کے سربراہ اسماعیل ہنیہ کے قتل کے بعد خطے میں کشیدگی بڑھ گئی ہے۔ اس سے ایک روز قبل بیروت میں اسرائیلی حملے کے نتیجے میں حزب اللہ کا ایک سینئر عسکری کمانڈر فؤاد شکر شہید ہو گیا تھا۔
ایران اور حماس نے اسماعیل ہنیہ کی شہادت کا الزام اسرائیل پر عائد کرتے ہوئے انتقام کی دھمکی بھی دی ہے۔ دوسری جانب اسرائیل نے نہ ہنیہ کی شہادت کی ذمے داری قبول کی ہے اور نہ ہی اس کی تردید کی ہے۔
جملہ حقوق بحق مرکز اطلاعات فلسطین محفوظ ہیں۔
