محمود المبحوح کے قاتلوں کی فہرست میں برطانوی شہری کرسٹوفر کا اضافہ

دبئی میں حماس کے رہ نما محمود المبحوح کے مشتبہ قاتلوں میں برطانوی شہری کرسٹوفر بلیک وڈ ایک نیا اضافہ ہیں جن کا نام انٹرپول نے بین الاقوامی طور پر مطلوب افراد کی فہرست میں شامل کرایا ہے۔ کرسٹوفر کی نشاندہی کے بعد محمود المبحوح کے قتل میں ملوث افراد کی تعداد33 ہو گئی ہے۔

غیر ملکی ٹیلیوژن کے مطابق36 سالہ برطانوی شہری کرسٹوفر وڈقاتلوں کے گینگ کے دبئی میں قیام سے متعلق انتظامات کی خاطر کئی بار متحدہ عرب امارات آیا اور اس مقصد کیلئے اس نے جعلی سفری دستاویزات استعمال کیں۔ ان کرائے کے قاتلوں نے جنوری میں حماس کے اہم رہ نما محمود المبحوح کو دبئی کے ایک فائیو اسٹار ہوٹل میں قتل کیا اوراسی رات وہ جائے واردات سے فرار ہو گئے۔ اسرائیل کے وزیر خارجہ ایویگڈور لائبرمین نے فروری میں ایک بیان میں کہا تھا کہ ان کا ملک مبحوح کے قتل میں ملوث نہیں تاہم موساد کے اس قتل میں ملوث ہونے کے ناقابل تردید ثبوت منظر عام پر آنے کے بعد برطانیہ نے بھی مارچ میں اسرائیلی سفارتکار کو لندن بدر کر دیا تھا۔