سلیم مانڈوی والا کی سینیٹ رکنیت فی الفور ختم کی جائے۔ فلسطین فاؤنڈیشن پاکستان

سلیم مانڈوی والا نے اسرائیل کی حمایت میں بیان دے کر پاکستان کے آئین اور بانی پاکستان کے نظریات سمیت نظریہ پاکستان کی توہین کی ہے۔ فلسطین فاؤنڈیشن پاکستان

مسئلہ فلسطین کی حمایت در اصل پاکستان کی بقاء و ترقی ہے۔ فلسطین فاؤنڈیشن پاکستان

اسرائیل کی حمایت میں اٹھنے والی آوازوں نے ملک دشمن عناصر کی نشاندہی کر دی ہے۔ فلسطین فاؤنڈیشن پاکستان

کراچی ( ) فلسطین فاؤنڈیشن پاکستان کے مرکزی سرپرست رہنماؤں بشمول سابق رکن قومی اسمبلی و رہنما جماعت اسلامی محمد حسین محنتی، نائب امیر مسلم پرویز، سابق اراکین سندھ اسمبلی محفوظ یار خان، میجر (ر) قمر عباس، پاکستان مسلم لیگ (ف) کے رہنما سردار رحیم،مجلس وحدت مسلمین سندھ کے صدر علامہ باقر زیدی، جمعیت علماء پاکستان کے رہنما علامہ قاضی احمد نورانی ، پاکستان تحریک انصاف کے رہنما اسرار عباسی، پاکستان پیپلز پارٹی کے رہنما ارشد نقوی، پاکستان مسلم لیگ نواز کے رہنما پیرزادہ ازہر علی شاہ ہمدانی، پاکستان مسلم لیگ (ق) کے رہنما صادق شیخ، عوامی نیشنل پارٹی کے رہنما یونس بونیری، جمعیت علماء اسلام (ف ) کے رہنما قاری عثمان، آل پاکستان سنی تحریک کے سربراہ مطلوب اعوان قادری، معروف کشمیری سماجی رہنما بشیر سدوزئی، ہیومن رائٹس کونسل کے جمشید حسین، سوچ عورت فاؤنڈیشن لی صدر ریحانہ عزیز، پی ٹی آئی خاتون رہنما عرم بٹ اور فلسطین فاؤنڈیشن پاکستان کے سیکرٹری جنرل ڈاکٹر صابر ابو مریم نے اپنے مشترکہ بیان میں ڈپٹی چیئر مین سینیٹ سلیم مانڈوی والا کے اسرائیل کی حمایت میں بیان کی شدید الفاظ میں مذمت کی ہے۔

فلسطین فاؤنڈیشن پاکستان کے رہنماؤں نے اراکین پارلیمنٹ ، سینیٹ اور صوبائی اسمبلیوں کے اراکین سے اپیل کی ہے کہ وہ سینیٹ کے اہم ترین عہدے پر فائز سلیم مانڈوی والا کی جانب سے اسرائیل کی حمایت میں بیان پر اپنی آواز بلند کریں۔ انہوں نے کہا کہ پاکستان کی نظریاتی سرحدوں کا دفاع آئین اور پارلیمنٹ نے کرنا ہے لیکن جب پارلیمنٹ اور سینٹ میں ہے بانی پاکستان کے مخالف نظریہ کے حامل لوگ پہنچ چکے ہوں تو پاکستان کو بیرونی دشمنوں سے کوئی خطرہ نہیں ہے۔

فلسطین فاؤنڈیشن پاکستان کے رہنماؤں نے حکومت سے مطالبہ کیا ہے کہ سلیم مانڈوی والا کو فی الفور سینیٹ کے اعلی عہدے سے برطرف کیا جائے۔ ان کا کہنا تھا کہ بانی پاکستان قائد اعظم محمد علی جناح کے نظریہ کا مذاق اڑانے والوں کو سخت سے سخت سزا دی جائے۔ انہوں نے مزید کہا کہ اسرائیل کے ساتھ پاکستان کو نتھی کرنے کی امریکی و عرب سازش کامیاب نہیں ہونے دین گے۔ انہوں نے کہا کہ اگر حکومت نے اس معاملہ پر سنجیدہ اقدامات نہ کئے تو احتجاج کا راستہ اپنائیں گے۔