مقبوضہ بیت المقدس کو یہودیانے کی سازش، مدعی سست گواہ چست

متحدہ عرب امارات کے اخبار ’’البیان ‘‘نے مقبوضہ بیت المقد س کو یہودیانے کی سازش پر مسلمانوں کی خاموشی کی مذمت کی ہے- اخبار نے ’’بیت المقدس کو خالی کیے جانے پر عرب ممالک کی خاموشی ‘‘ کے عنوان سے اداریے میں لکھا ہے کہ مشرقی بیت المقدس کو یہودیانے کی کارروائی جاری ہے- اس کارروائی میں جس تیزی سے اضافہ ہو اہے وہ پہلے کبھی دیکھنے میں نہیں آیا- اسرائیل جلد ازجلد دومقاصد حاصل کرنا چاہتاہے- پر وہ بیت المقدس کا ڈیموگرافک توازن یہودیوں کے حق میں کرنا چاہتاہے اور وہ مشرقی بیت المقدس اور مغربی کنارے کا جغرافیائی تعلق ختم کرنے کے لئے کوشاں ہے – اخبار مزید لکھتا ہے کہ تعجب کی بات ہے کہ اسرائیل کی سازشوں کے مقابلے میں مسلمانوں کا ردعمل نہ ہونے کے برابر ہے جبکہ اس کے برعکس یورپی ممالک نے اسرائیلی سازش کے خلاف آواز بلند کی ہے اور اسے لگا م ڈالنے کا مطالبہ کیا ہے- حیران کن امر یہ ہے کہ جن کا مسئلہ ہے وہ خاموش ہیں جبکہ یورپی ممالک متحرک ہوگئے ہیں- مدعی سست گواہ چست والا معاملہ ہے – اخبار لکھتاہے کہ اسرائیل نے بیت المقدس سے فلسطینیوں کے خاتمے کے لئے ہر قسم کے ذرائع استعمال کئے ہیں ان کے گھروں کو خریدا گیا ، جو گھر خریدے نہ جاسکے انہیں مسمار کر دیا گیاہے- فلسطینیوں کی زمینوں پر قبضہ کیاجا رہاہے – فلسطینی اداروں کو بند کیا جا رہا ہے- مسجد اقصی کو شہید کرنے کی دھمکی دی جا رہی ہے ۔