فلسطین فاؤنڈیشن پاکستان کے مرکزی سر پرست رہنماؤں سابق رکن قومی اسمبلی و رہنما جماعت اسلامی مظفر احمد ہاشمی، جمعیت علماء پاکستان کراچی کے صدر علامہ قاضی احمد نورانی صدیقی ،پاکستان مسلم لیگ ن کے رہنما اظہر علی ہمدانی، مجلس وحدت مسلمین کے رہنما علامہ صادق رضا تقوی، پاکستان عوامی
مسلم لیگ کے مرکزی رہنما محفوظ یار خان ایڈووکیٹ اور فلسطین فاؤنڈیشن پاکستان کے مرکزی ترجمان صابر کربلائی نے اہلیان کراچی سے اپیل کی ہے کہ وہ آج بروز اتوار کو شاہراہ فیصل پر ہونے والے ’’غزہ ملین مارچ‘‘ میں بھرپور شرکت کریں اور فلسطینی عوام سے اپنی والہانہ محبت اور لگاؤ کا عملی ثبوت دیں۔
فلسطین فاؤنڈیشن پاکستان کے رہنماؤں نے جماعت اسلامی کراچی کے تحت آج اتوار کے روز غزہ پر جاری صیہونی اسرائیلی بربریت کے خلاف نکالے جانے والے ’’غزہ ملین مارچ‘‘ کی بھرپور حمایت کا اعلان کرتے ہوئے ’’غزہ ملین مارچ‘ ‘ میں شرکت کا اعلان کیا ہے اور کہا ہے کہ فلسطین فاؤنڈیشن پاکستان ’’غزہ ملین مارچ‘‘ کے راستے میں شاہراہ قائدین فلائی اوور کے نزدیک فلسطینیوں پر ڈھائے جانے والے اسرائیلی مظالم پر مبنی ایک تصویری نمائش کا انعقاد بھی کیا جائے گا۔
