فلسطین فائونڈیشن پاکستان کے مرکزی سرپرست رہنما مظفر احمد ہاشمی کا شہید آفتاب جعفری کی پہلی برسی کی مناسبت سے اپنے پیغام میں کہنا تھا کہ اسلام کی تاریخ میں شہداء کی ایک بڑی تعداد موجود ہے
جن میں ایک شہید آفتاب حیدر بھی ہیں، میں شہید کے دوستو ں، ساتھیوں اور بالخصوص اہل خانہ کو دلی تعزیت پیش کرتا ہوں اور اللہ تعالیٰ سے دعا گو ہوں کہ شہید کے اہل خانہ کو صبر جمیل عطا فرمائے۔
شہید آفتاب جعفری کی شہادت ہمارے لئے اعزاز اور فخر کا باعث ہے، مظفرہاشمی
سابق ممبر قومی اسمبلی وجماعت اسلامی پاکستان کے رہنما اور فلسطین فائونڈیشن پاکستان کے مرکزی سرپرست رہنما مظفر احمد ہاشمی کا شہید آفتاب جعفری کی پہلی برسی کی مناسبت سے اپنے پیغام میں کہا کہ ”شہید علامہ آفتاب حیدر جعفری ایک انتھک محنت کرنے والی شخصیت کا نام ہے، کہ جنہوں نے سرزمین پاکستان پر طاغوتی طاقتوں کے سامنے سینہ سپر ہو کر پاکستان کی سرزمین پر عالمی سامراجی ایجنڈے کو ناکام بنانے کی انتھک کوشش کی اور آپ کی شہادت اس بات کا ثبوت ہے کہ شہید جعفری کا وجود دشمنان اسلام و پاکستان کے لئے ناقابل قبول ہو چکا تھا۔ شہید آغا آفتاب حیدر نے سرزمین پاکستان پر مظلوم فلسطینیو ں کے حقوق کی آواز بلند کرتے ہوئے عالمی صیہونی طاقتوں کو للکارا اور پوری دنیا کی توجہ مسئلہ فلسطین کی طرف گامزن کروانے کی کوشش کی تاکہ گذشتہ پینسٹھ برسوں سے اسرائیلی مظالم کی چکی میں پسنے والے مظلوم فلسطینیوں کی نجات کے لئے سدباب کیا جائے، ہم یہ سمجھتے ہیں کہ شہید آغا آفتاب حیدر جعفری کی شہادت کے ساتھ جہاں ہمیں یہ اعزاز حاصل ہوا کہ ملت پاکستان کا خون بھی مسلمانوں کے قبلہ اول کی آزادی کی جدوجہد میں شریک ہو ا وہاں ہمارے لئے ایک دکھ کی بات یہ ہے کہ ہمارے درمیان آغا آفتاب جعفری کی عظیم شخصیت نہیں رہی، یقینا شہید آفتاب حیدر کی شہادت پاکستان کے لئے نقصان عظیم ہے اور پاکستان میں فلسطین کاز کو شدید دھچکا بھی پہنچا ہے۔
مطفرہاشمی کا کہناتھا کہ میں امید کرتا ہوں کہ پاکستان کی سرزمین پر شہید آفتاب حیدر جعفری کے مشن کو زند ہ رکھنے کے لئے سیکڑوں آفتاب طلوع ہوں گے اور شہید کے مشن کو زندہ رکھیں گے، میں امریکہ اور اس کی ناجائز اولاد اسرائیل کو پیغام دینا چاہتا ہوں کہ شہید جعفری کی شہادت ہمارے لئے اعزاز اور فخر کا باعث ہے اور فلسطینی عوام کی حمایت کسی صورت ترک نہیں کریں گے کیونکہ شہید آفتاب جعفری کا عقیدہ تھا کہ دفاع فلسطین دفاع پاکستان ہے اور دفاع اسلام ہے، اس لئے ہم اسلام کا دفاع کرتے رہیں گے۔ اسلام کی تاریخ میں شہداء کی ایک بڑی تعداد موجود ہے جن میں ایک شہید آفتاب حیدر بھی ہیں، میں شہید کے دوستوں، ساتھیوں اور بالخصوص اہل خانہ کو دلی تعزیت پیش کرتا ہوں اور اللہ تعالیٰ سے دعا گو ہوں کہ شہید کے اہل خانہ کو صبر جمیل عطا فرمائے اور ہمیں توفیق دے کہ ہم شہید جعفری کے مشن فلسطین کو زندہ وجاوید رکھیں’۔
