اسماعیل ھنیہ کا شیخ قرضاوی کو فون، غزہ آنے کی دعوت

فلسطینی وزیر اعظم اسماعیل ھنیہ نے مصر کے معروف عالم دین ڈاکٹر شیخ علامہ یوسف قرضاوی کو ٹیلی فون کرکے مصری انقلاب پر مبارکباد پیش کی ہے اور مسئلہ فلسطین کے حل اور غزہ کا محاصرہ ختم کروانے کے ان کے بیان پر ان کا شکریہ ادا کیا ہے۔ وزیر اعظم نے شیخ قرضاوی کو غزہ کے دورے کی دعوت بھی دی اور ان سے درخواست کی کہ وہ غزہ آکر نماز جمعہ کی امامت کروائیں تاکہ لاکھوں فلسطینی ان کی اقتداء میں نماز پڑھ سکیں، فلسطینی وزیر اعظم کا کہنا تھا کہ ان کا یہ عمل مسجد اقصی میں ان کی امامت میں مسجد اقصی میں نماز کا پیش خیمہ ثابت ہوگا۔ دوسری جانب شیخ قرضاوی نے ان کی دعوت پر شکریہ ادا کیا اور اس پر عمل کرنے کی یقین دہانی کروائی، شیخ قرضاوی نے اہل غزہ کی جرات اور ثابت قدمی کو خراج تحسین پیش کیا اور فلسطین کی جلد آزادی کی خواہش کا اظہار بھی کیا۔ واضح رہے کہ جمعہ کے روز شیخ قرضاوی نے لاکھوں کے اجتماع میں مصری حکام سے رفح کراسنگ کھولنے کا مطالبہ کیا تھا جس کے بعد صدر حسنی مبارک کی رخصتی کے بعد مصر کے نئے حکام نے تین روز کے لیے رفح کراسنگ کھولنے کے احکامات صادر کر دیے تھے تاکہ مصر میں پھنسے تمام فلسطینیوں کی غزہ واپسی ممکن ہو سکے۔ ماہرین غزہ اور مصر کے مابین واحد ’’رفح‘‘ کراسنگ کو جزوی طور پر کھولے جانے کو بندش کے مکمل خاتمے کے لیے مددگار قرار دے رہے ہیں۔ ستمبر 1926 کو پیدا ہونے والے شیخ قرضاوی عالم اسلام کی معروف شخصیت ہیں، الجزیرہ ٹی وی پر نشر ہونے والا ان کا پروگرام ’’الشریعہ والحیاۃ‘‘ اسلامی دنیا میں انتہائی مقبول ہے۔ انہیں مصر کی سب سے بڑی اسلامی جماعت ’’اخوان المسلمین‘‘ کا دانشور رہنما شمار کیا جاتا ہے۔