مصری عوام کو آزاد مرضی سے حکومت سازی کا موقع دیا جائے:ایردوان

ترکی کے وزیراعظم رجب طیب ایردوان نے مصری فوج پر زور دیا ہے کہ وہ اقتدار جلد از جلد منتخب نمائندوں کے حوالے کرنے لیے ملک میں انتخابات کرائے. ان کا کہنا ہے کہ بعض بیرونی طاقتیں مصرمیں استحکام نہیں چاہتیں. ان کی کوشش ہے کہ مصر افراتفری کا شکار رہے اور وہ اپنےمفادات سمیٹتے رہیں. انقرہ میں وزیراعظم ہاٶس کی جانب سے جاری ایک بیان میں وزیراعظم ایردوان کا کہنا تھا کہ ان کا ملک مصر میں دستور اور جمہوریت کی بحالی چاہتا ہے. ترکی مصری عوام کی مدد جاری رکھے گا اور جلد از جلد جمہوری حکومت کے قیام میں سیاسی اورعسکری قیادت کی معاونت کرے گا. انہوں نے خبردار کیا کہ بعض طاقتیں مصرمیں عدم استحکام چاہتی ہیں کیونکہ مصر میں افراتفری ان کے مفاد میں ہے. انہوں نے کہا کہ مصرمیں آزادانہ اور شفاف انتخابات مصری قوم کا بنیادی حق ہے اور عالمی برادری کو چاہیے کہ مصرمیں جمہوریت کے نفاذ کوانسانی حقوق کے طور پر لے. ادھر دوسری جانب ترکی کے وزیرخارجہ احمد داٶد اوگلو نے جارجیا کے دورے کے دوران باتومی شہر میں ایک نیوز کانفرنس سے خطاب کرتے ہوئے کہا کہ مصرمیں عوامی انقلاب عرب ممال میں جمہوریت کا نقطہ آغاز ہے. اس کے بعد دیگرعرب ملکوں میں بھی اس طرح کے انقلابات برپا ہو سکتے ہیں. احمد داٶد اوگلو نےمصری عوام کوحسنی مبارک سے نجات پر انہیں مبارک باد پیش کی اورامید ظاہر کی کہ آئندہ کی مصری حکومت مصری قوم کی امنگوں کے مطابق فیصلے کرے گی نہ کہ بیرونی اشاروں پر کام کرے گی.