اسرائیل نے یورپی میڈیکل کمیٹی کو فلسطینی اسیر رہنماؤں کے معائنے سے روک دیا

اسرائیل کی جیل انتظامیہ نے یورپی میڈیکل کمیٹی کو اپنے عقوب خانوں میں موجود معروف فلسطینی اسیر رہنماؤں کی حالت زار کے معائنے سے روک دیا ہے۔ اسرائیلی جیلوں میں شیخ جمال ابو الھیجاء، پاپولر فرنٹ کے سیکرٹری جنرل، ھیثم صالحیہ، عابد شلوف جیسے رہنماؤں کی انتہائی نازک ہوچکی ہے۔ فلسطینی اسیران کی کمیٹی کے جاری کردہ بیان کے مطابق اس کمیٹی نے اسرائیلی حکام سے اس بات کی اجازت طلب کی کہ یورپی اطباء کے وفد کو سخت امراض میں مبتلا فلسطینی اسیران کے طبی معائنے کی اجازت دی جائے جس کو جیل انتظامیہ نے مسترد کر دیا۔ کمیٹی نے بتایا کہ حماس کے ایک معروف رہنما شیخ جمال ابو الھیجا کو مکمل طور پر قید تنہائی میں ڈال دیا گیا ہے، صہیونی عدالت نے انہیں متعدد مرتبہ قید تنہائی میں ڈالنے کے احکامات صادر کیے ہیں اور یہ مدت 80 سال سے زیادہ بنتی ہے۔ کمیٹی نے زور دے کر کہا کہ ابوالھیجاء اسرائیلی فائرنگ کے سبب پہلے ہی شدید زخمی تھے کہ انہیں قید تنہائی میں ڈال دیا گیا ہے جہاں ان کی صحت کا بالکل خیال نہیں رکھا جا رہا۔ اسی طرح پاپولر فرنٹ کے احمد سعدات متعدد خطرناک امراض میں مبتلا ہو چکے ہیں اور ان کی تکالیف ناقابل بیان ہیں۔ ان کو تمام جائز حقوق سے محروم رکھنے اور قید تنہائی میں رکھنے کے ساتھ ساتھ علاج کی سہولتوں سے بھی محروم کردیا گیا ہے۔ اسیران کمیٹی نے 15 نومبر 2002ء سے گرفتار اسیر ھیثم صالحیہ کے بارے میں بتایا کہ ’’القسام بریگیڈ‘‘ کے اس دلیر کارکن کو عمر قید سنائی گئی ہے اور ان کی صحت کی حالت انتہائی نازک ہے اس کے باوجود ان کو ڈاکٹر کی ملاقات کی اجازت نہیں دی جا رہی۔ کمیٹی نے صالحیہ کے حوالے سے بتایا کہ وہ ان کی زندگی خطرے میں ہے اور وہ صہیونی انتظامیہ کی جانب سے کرائے گئے ٹیسٹوں پر اعتماد نہیں رکھتے۔ کمیٹی نے صالحیہ کے معاملے کی تحقیقات کے لیے ریڈ کراس سمیٹ دیگر تنظیموں کے نمائندوں پر مشمتل کمیٹی کی تشکیل کا مطالبہ کیا۔ اسیران امور کی فلسطینی کمیٹی نے حماس کے ایک اور رہنما زامل عابد سالم شلوف کے بارے میں بتایا کہ وہ 25 مارچ 2008ء سے ’’ایشل‘‘ جیل میں ہیں انہیں پندرہ برس کی قید سنائی گئی ہے، وہ ہارٹ کی بیماری میں مبتلا ہیں لیکن صہیونی انتظامیہ مجرمانہ لاپرواہی کا مظاہرہ کر رہی ہے۔