محمود عباس کی الفتح کو قطری ٹی وی الجزیرہ کے بائیکاٹ کی ہدایت

مقبوضہ مغربی کنارے میں متنازعہ فلسطینی صدر محمود عباس نے اپنی جماعت الفتح کو ہدایت کی ہے کہ وہ قطری ٹی وی الجزیرہ پر اتھارٹی کی خفیہ دستاویزات کو نشر کرنے پر اس کا بائیکاٹ کرے. مرکز اطلاعات فلسطین کے مطابق صدرعباس کے دفتر سے فتح کے تمام اہم رہ نماٶں کو ایک مراسلہ ارسال کیا ہے، جس میں انہیں ہدایت کی گئی ہے کہ وہ الجزیرہ ٹی وی کا ہرقسم کا بائیکاٹ کرتے ہوئے اس کے پروگرامات میں شرکت سے باز رہیں. صدارتی فرمان میں فتح سے کہا گیا ہے کہ وہ نہ تو اپنی کوئی خبر الجزیرہ کے ذریعے نشر کریں اور نہ ہی ان کے کسی پروگرام میں تنظیم کا کوئی رکن شرکت کرے. صدرعباس کے اس فرمان میں قطری ٹی وی پر کڑی تنقید کرتے ہوئے تمام خفیہ دستاویزات کی اشاعت کو فلسطینی اتھارٹی کے خلاف گمراہ کن پروپیگنڈہ قرار دیا ہے. خیال رہے کہ ایک روز قبل الجزیرہ ٹی وی نے فلسطینی اتھارٹی کی کئی سوخفیہ دستاویزات شائع کی تھیں جن میں انکشاف کیا گیا تھا کہ فلسطینی اتھارٹی اسرائیل کے ساتھ خفیہ مذاکرات میں بہت سے فلسطینی حقوق سے دستبردار ہونے اور مسجد اقصیٰ پر بھی مذاکرات پر آمادہ ہو چکی تھی .