مقبوضہ مغربی کنارہ – (مرکزاطلاعات فلسطین فاؤنڈیشن) فلسطینی مرکز اطلاعات معطی نے گذشتہ 48 گھنٹوں کے دوران مقبوضہ مغربی کنارے کے مختلف علاقوں میں 24 مزاحمتی کارروائیاں ریکارڈ کی ہیں جن کے دوران قابض افواج کے ساتھ جھڑپیں اور غیر قانونی آباد کاروں کے حملوں کا مقابلہ کیا گیا جبکہ ان کارروائیوں کے نتیجے میں قابض افواج کی صفوں میں ایک اہلکار زخمی ہوا۔
مرکز کے مطابق ان کارروائیوں میں پتھراؤ کی 19 جھڑپیں، یہودی آباد کاروں کے حملوں کا مقابلہ کرنے کے دو واقعات، گاڑی چڑھانے کی ایک کارروائی اور یہودی آباد کاروں کی ایک گاڑی کو نقصان پہنچانے کے علاوہ ایک عوامی مظاہرہ شامل ہے۔
بیت المقدس، رام اللہ، جنین، نابلس اور الخلیل کی گورنریاں ان واقعات کا مرکز رہیں، چنانچہ بیت المقدس گورنری کے علاقے کفر عقب میں جھڑپیں پھوٹ پڑیں جبکہ رام اللہ گورنری میں جھڑپوں کا دائرہ قراوہ بنی زید، البیرہ، کفر عین، عابود، بیت ریما، دورا القرع، دیر غسانہ اور المغیر کے دیہات اور قصبوں تک پھیل گیا۔
جنین گورنری کے قصبے عنزا میں جھڑپیں اور پتھراؤ ریکارڈ کیا گیا جبکہ نابلس گورنریٹ میں غیر قانونی بستی حفات جلعاد کے گرد و نواح نیز الساویہ اور سالم کے قصبوں میں واقعات پیش آئے جن میں گاڑی چڑھانے کی کارروائی، جھڑپیں، غیر قانونی آباد کاروں کے حملوں کا مقابلہ اور عوامی مظاہرے شامل تھے۔
دوسری جانب الخلیل گورنری میں فلسطینیوں نے الظاہریہ میں غیر قانونی آباد کاروں کے حملوں کا ڈٹ کر مقابلہ کیا جبکہ اسی دوران دورا اور بیت امر میں جھڑپیں اور پتھراؤ کے واقعات پیش آئے۔
نمایاں ترین واقعات میں جنوب مغربی نابلس میں غیر قانونی بستی حفات جلعاد کے چوراہے پر غیر قانونی آباد کاروں کے اجتماع اور فلسطینی گاڑیوں کا راستہ روکنے کے دوران ایک فلسطینی گاڑی کے ذریعے کی گئی کارروائی میں ایک غیر قانونی آباد کار زخمی ہو گیا جبکہ جنوبی الخلیل کے قصبے الظاہریہ کے قریب پتھراؤ کے نتیجے میں غیر قانونی آباد کاروں کی ایک گاڑی کو نقصان پہنچا۔
یہ اعداد و شمار مغربی کنارے کے مختلف علاقوں میں جھڑپوں اور غیر قانونی آباد کاروں کے حملوں کے خلاف مزاحمت کے تسلسل کی نشاندہی کرتے ہیں جس میں دو دنوں کے دوران کارروائیوں کے طریقوں میں تنوع اور جغرافیائی دائرہ کار میں وسعت دیکھی گئی ہے۔
