واشنگٹن (مرکزاطلاعات فلسطین فاؤنڈیشن) امریکی خصوصی ایلچی جیرڈ کوشنر نے حماس کو سخت انتباہ دیتے ہوئے کہا ہے کہ اسے غزہ میں غیر مسلح ہونے سے متعلق اپنے وعدوں کی پاسداری کرنا ہوگی، بصورت دیگر اسرائیل کو فوجی کارروائی کے ذریعے جنگ مکمل کرنے کے لیے امریکی حمایت حاصل ہو سکتی ہے۔
کوشنر نے پیر کے روز فاکس نیوز کے چیف غیر ملکی نمائندے ٹری ینگسٹ سے خصوصی گفتگو میں کہا کہ گزشتہ 48 گھنٹوں کے دوران مصر اور اسرائیل میں اعلیٰ سطحی سفارتی ملاقاتوں کا مقصد صدر ڈونلڈ ٹرمپ کے غزہ امن منصوبے پر پیش رفت کرنا تھا، تاہم اسرائیل اور حماس کے درمیان لڑائی اور اختلافات بدستور برقرار ہیں۔
رپورٹ کے مطابق جنگ بندی کے باوجود اسرائیل نے غزہ پر فضائی حملے جاری رکھے اور مزید علاقوں پر قبضہ کیا ہے، جبکہ حماس نے اپنے ہتھیار چھوڑنے سے انکار کیا ہے۔
کوشنر نے قاہرہ میں حماس کے نمائندوں سے ملاقات کی، جہاں نیشنل کمیٹی بھی موجود تھی۔ یہ نئی تکنوکریٹک فلسطینی حکومت ہے جسے غزہ کا انتظام سنبھالنا ہے۔
کوشنر کے بیان سے ظاہر ہوتا ہے کہ غزہ میں جنگ بندی کے باوجود اسرائیل اور حماس کے درمیان غیر مسلح ہونے، غزہ کے مستقبل کے انتظام اور امن منصوبے کے دیگر نکات پر اختلافات بدستور موجود ہیں۔
