مقبوضہ مغربی کنارہ – (مرکزاطلاعات فلسطین فاؤنڈیشن) فلسطینی انفارمیشن سینٹر ‘معطی’ نے اپنی تازہ رپورٹ میں انکشاف کیا ہے کہ 3 جولائی سے 9 جولائی 2026ء کے درمیان مغربی کنارے کے مختلف علاقوں میں قابض اسرائیلی فوج اور یہودی آباد کاروں نے 1183 مرتبہ انسانی حقوق کی خلاف ورزیاں کی ہیں۔
مرکز کے اعداد و شمار کے مطابق، ان خلاف ورزیوں کے نتیجے میں ایک فلسطینی شہید اور 44 شہری مختلف نوعیت کے زخموں سے زخمی ہوئے، جبکہ اس دوران 130 افراد کو گرفتار یا حراست میں لیا گیا۔
رپورٹ میں قابض افواج کی میدانی کارروائیوں میں خطرناک اضافے کو نمایاں کیا گیا ہے، جس میں شہروں اور قصبوں پر 166 بار دھاوے بولے گئے، 252 گھروں میں گھس کر توڑ پھوڑ اور تلاشی لی گئی، املاک ضبط کی گئیں، 41 مرتبہ براہِ راست فائرنگ کی گئی، اور 57 سرکاری و نجی تنصیبات کو مسمار یا تباہ کیا گیا۔
مرکز نے نشاندہی کی کہ قابض حکام نے شہریوں پر مزید شکنجہ کستے ہوئے فوجی چوکیوں (چیک پوائنٹس) پر 292 مرتبہ سخت پابندیاں عائد کیں، 43 مرتبہ اہم راستوں اور علاقوں کو بند کیا، جبکہ اس دوران یہودی آباد کاروں نے 136 حملے کیے، جن میں 5 بار براہِ راست جسمانی تشدد اور مار پیٹ کے واقعات شامل ہیں۔
رپورٹ کے مطابق، سات ایسے واقعات ریکارڈ کیے گئے جن میں اسلامی اور مسیحی مقدس مقامات کو نشانہ بنایا گیا، تین خلاف ورزیاں تعلیم اور صحافت کے شعبوں کے خلاف ہوئیں، جبکہ شہریوں کو ان کی زمینوں اور گھروں سے زبردستی بے دخل کرنے کے 6 واقعات بھی پیش آئے۔
