یہودی بستیوں کی تعمیر، ہالینڈ حکام کا اسرائیلی وفد کے استقبال سے انکار

ہالینڈ حکام نے مغربی کنارے میں یہودی بستیوں کے بعض رہنماؤں پر مشتمل اسرائیلی وفد کا دورہ ہالینڈ منسوخ کرتے ہوئے صہیونی رہنماؤں سے ملنے سے انکار کر دیا۔ ملاقات کا انتظام اگلے ماہ ہالینڈ اور اسرائیل کے مابین خفیہ معلومات کے تبادلے کے لیے کیا گیا تھا۔ ہالینڈ کی وزارت خارجہ نے دورے کے منسوخی کا فیصلہ اسرائیلی وفد میں یہودی بستیوں کی تعمیر کے حامی رہنماؤں کی شرکت کی اطلاعات موصول ہونے کے بعد کیا۔ وزارت کے مطابق ہالینڈ مغربی کنارے میں یہودی بستیوں کی تعمیر کی کھل کا مخالفت اور مقبوضہ فلسطین میں یہودی آباد کاری کو تسلیم نہ کرنے کے یورپی یونین کے فیصلے کی بھرپور حمایت کرتا ہے چنانچہ یہودی آباد کاری کے حامی لیڈروں سے کسی صورت نہیں ملا جا سکتا۔ دوسری جانب ہالینڈ کے حالیہ فیصلے کے بعد اسرائیلی حکام شدید غصے میں آ گئے ہیں، چنانچہ رکن کنیسٹ نے ’’اریا ایلڈاڈ‘‘ نے شدید برہمی کا اظہار کرتے ہوئے کہا ہالینڈ نے ملک میں بڑھتی ہوئی مسلم اقلیت کے سامنے سرنڈر کر دیا ہے۔ واضح رہے کہ اسرائیل یہودی بستیوں کی تعمیر کو داخلی معاملہ قرار دے کر ہالینڈ اور دیگر عالمی برادری کو مسترد کرتا چلا آ رہا ہے۔