(مرکزاطلاعات فلسطین فاؤنڈیشن) فلسطینی تنظیم ” ہند رجب” نے اعلان کیا ہے کہ اس نے آسٹریا میں قابض اسرائیل کے فوجی یوناتان اکریف کے خلاف فوجداری مقدمہ دائر کر دیا ہے۔ اکریف پر غزہ کے خلاف قابض اسرائیلی فوجی یلغار کے دوران جنگی جرائم انسانیت کے خلاف جرائم اور فلسطینی عوام کی نسل کشی میں معاونت کے سنگین الزامات عائد کیے گئے ہیں۔
ادارے نے تصدیق کی ہے کہ یہ مقدمہ اس بات کی تصدیق کے بعد دائر کیا گیا کہ یوناتان اکریف آسٹریا کی سرزمین پر موجود ہے۔ اس طرح بین الاقوامی قانون کے تحت آسٹریا پر لازم ہو جاتا ہے کہ وہ اپنی عدالتی حدود میں موجود ایسے افراد کے خلاف تحقیقات کرے جو انتہائی سنگین جرائم کے ارتکاب کے شبہے میں ہوں۔
یہ فوجداری دعویٰ ادارہ ہند رجب کی تحقیقات پر مبنی ہے جن میں اکریف کی بٹالین 8717 الون میں خدمات کو دستاویزی شکل دی گئی ہے۔ یہ وہ یونٹ ہے جس کا نام غزہ میں شہری انفراسٹرکچر کی منظم تباہی سے بارہا جوڑا جا چکا ہے۔
ادارہ ہند رجب کے ڈائریکٹر جنرل دیاب ابو جہجہ نے کہا کہ پورے یورپ میں ہم قانونی ذمہ داریوں اور سیاسی ہچکچاہٹ کے درمیان بڑھتی ہوئی خلیج دیکھ رہے ہیں۔ آسٹریا میں یہ مقدمہ دائر کر کے ہم اس خلیج کو کم کر رہے ہیں۔
انہوں نے مزید کہا کہ ہمارا عزم واضح ہے۔ سنہ 2026ء کو غزہ میں نسل کشی کے متاثرین کے لیے انصاف کا سال بننا چاہیے نہ کہ ایک اور سال جس میں مجرم سزا سے بچ نکلیں۔
ادارہ ہند رجب کا قیام فروری سنہ 2024ء میں اس دلخراش واقعے کے پس منظر میں عمل میں آیا جو چھ سالہ فلسطینی بچی ہند رجب کے ساتھ پیش آیا۔ سنہ 29 جنوری 2024ء کو غزہ کے علاقے تل الہوا میں ہند اپنے چند رشتہ داروں کے ساتھ ایک گاڑی میں موجود تھی کہ قابض اسرائیلی ٹینکوں نے گاڑی پر حملہ کر دیا اور اندھا دھند فائرنگ شروع کر دی۔ اس سفاکیت کے نتیجے میں ہند کے ساتھ موجود اس کے چھ رشتہ دار شہید ہو گئے جبکہ صرف چھ سالہ ہند زندہ بچی۔
اس دوران ہند کی آواز ایک فون کال کے ذریعے دنیا تک پہنچی جس میں وہ اپنی والدہ سے التجا کر رہی تھی کہ وہ آئے اور اسے گاڑی سے نکال لے۔ اس نے بتایا کہ گاڑی میں موجود سب لوگ مارے جا چکے ہیں اور وہ اکیلی زندہ ہے۔ خوف سے لرزتی ہند نے اپنی والدہ سے منت کی کہ کسی کے پہنچنے اور اسے بچانے تک فون بند نہ کیا جائے۔
دوسری جانب والدہ نے اپنی بیٹی کو تسلی دینے کی کوشش کی اور کہا کہ سول ڈیفنس اسے بچانے آ رہی ہے۔ انہوں نے وعدہ کیا کہ وہ فون بند نہیں کریں گی اور ہند کے ساتھ لائن پر رہیں گی اور اس سے اللہ سے دعا کرنے کو کہا۔ یہ فون کال تقریباً ستر منٹ تک جاری رہی جس کے بعد ہند کی آواز خاموش ہو گئی۔ بعد ازاں یہ انکشاف ہوا کہ قابض اسرائیلی ٹینکوں نے ہند کو شہید کر دیا اور اس کی آواز کو ہمیشہ کے لیے خاموش کر دیا۔
ادارہ ہند رجب کا مرکزی دفتر برسلز میں قائم ہے اور یہ ادارہ دنیا بھر میں قابض اسرائیل کے سیاسی اور فوجی ذمہ داران کے خلاف قانونی کارروائیوں کے لیے سرگرم عمل ہے۔
