مقبوضہ مغربی کنارہ – (مرکزاطلاعات فلسطین فاؤنڈیشن) قابض اسرائیل کے داخلی سکیورٹی ادارے “شاباک” نے مقبوضہ مغربی کنارے سے پانچ نوجوانوں کی گرفتاری کا اعلان کیا ہے۔ شاباک نے دعویٰ کیا ہے کہ ان نوجوانوں کو لبنان میں بھرتی کیا گیا تھا اور انہیں ایک صہیونی بستی کی تصاویر بنانے اور مسلح کارروائی کے لیے فائرنگ کی تربیت حاصل کرنے کا مشن سونپا گیا تھا، جس کے بعد ان کے خلاف فردِ جرم بھی عائد کر دی گئی ہے۔
شاباک کی جانب سے جاری کردہ بیان کے مطابق گرفتاری کا یہ عمل گذشتہ برس اکتوبر میں عمل میں لایا گیا تھا۔ بیان میں بتایا گیا ہے کہ مغربی کنارے کے گاؤں عنزہ کے رہائشی محمد صدقہ کو گرفتار کر کے اس سے تفتیش کی گئی، جس میں یہ دعویٰ کیا گیا کہ اس نے لبنان کا دورہ کیا جہاں اسے موسیٰ ابو سیف نامی ایک لبنانی شخص نے مغربی کنارے میں سرگرمیوں اور ایک “عسکری سیل” کی تشکیل کے لیے دیگر افراد کو بھرتی کرنے کے مشن پر مامور کیا تھا۔
بیان میں مزید کہا گیا ہے کہ محمد صدقہ نے اس گروہ میں کئی افراد کو شامل کیا جن میں رام اللہ کے رہائشی محمد خلیل اور عنزہ کے رہائشی محمد براہمہ شامل ہیں۔ شاباک نے ان دونوں کو بھی گرفتار کر کے تفتیش کے لیے منتقل کر دیا ہے۔
بیان کے مطابق محمد صدقہ اپنی گرفتاری تک سوشل میڈیا نیٹ ورکس اور ایک گیمنگ ایپلی کیشن کے ذریعے لبنان میں موجود گروپ سے رابطے میں رہا۔
شاباک نے مزید بتایا کہ اس نے مغربی کنارے کے قصبے تل سے بھی دو نوجوانوں ضیاء الدین حمد اور ناصر عصیدہ کو گرفتار کر کے تفتیش کی ہے۔ دورانِ تفتیش یہ بات سامنے آئی کہ انہیں بھی اسی لبنانی گروپ نے بھرتی کیا تھا۔
شاباک کے بیان میں دعویٰ کیا گیا ہے کہ ان نوجوانوں کی بھرتی لبنانی افراد نے کی تھی جن میں سے ایک کا نام مجاہد بتایا گیا ہے جبکہ دو دیگر افراد “ابو احمد” اور “ابو وحید” کے نام سے پہچانے جاتے ہیں۔ ان افراد نے ضیاء الدین حمد اور ناصر عصیدہ سے سوشل میڈیا اور دیگر پلیٹ فارمز کے ذریعے رابطہ کیا تھا۔
شاباک نے یہ دعویٰ بھی کیا ہے کہ ان دونوں نوجوانوں کو فائرنگ کی تربیت دی گئی اور انہوں نے مغربی کنارے میں ایک صہیونی بستی کی تصاویر بھی کھینچیں، جبکہ لبنانی گروپ نے انہیں اسلحہ کی خریداری کے لیے رقم منتقل کرنے کا معاہدہ بھی کیا تھا۔
شاباک کے مطابق اس لبنانی گروپ کی سربراہی مجاہد دہشہ نامی شخص کر رہا ہے جس کے بارے میں دعویٰ کیا گیا ہے کہ وہ حماس کے ارکان کے ساتھ جڑا ہوا ہے۔
