مصر کو غزہ نہیں بلکہ اسرائیل سے خطرہ ہے: خالد مشعل

اسلامی تحریک مزاحمت (حماس) کے پولٹ بیورو کے سربراہ خالد مشعل نے کہا ہے کہ سعودی عرب فلسطینی مصالحت کے حوالے سے حماس کا مؤقف سمجھتا ہے- انہوں نے سعودی عرب کے دارالحکومت ریاض میں اسلامی کانفرنس تنظیم کے دفتر پر پریس کانفرنس سے خطاب کرتے ہوئے کہا کہ انہوں نے سعودی وزیر خارجہ شہزادہ سعود الفیصل سے فلسطینی مسائل کے حوالے سے تبادلہ خیال کیا جس میں سرفہرست فلسطینی مصالحت کا مسئلہ تھا- خالد مشعل نے کہا کہ جن مسلمان رہنماؤں سے ان کی ملاقات ہو رہی ہے وہ حماس کے مؤقف کو سمجھ رہے ہیں- فلسطینیوں کے درمیان اختلافات کے خاتمے کے حوالے سے حماس مصری تجویز کو مسترد یا تبدیل نہیں کرنا چاہتی- وہ چاہتی ہے کہ قاہرہ میں فلسطینی گروپوں کو درمیان جو باتیں طے پائیں تھیں ان پر عمل کیا جائے- خالد مشعل نے مزید کہا کہ وہ فلسطینی مصالحت کے لیے فلسطینی صدر محمود عباس سے کہیں بھی کسی بھی وقت ملنے کیلئے تیار ہیں- انہوں نے کہا کہ اگر کسی نے ان سے برا بھی کیا ہو تب بھی وہ ان سے ملنے کے لیے تیار ہیں- صرف اسرائیل کی طرف ہاتھ بڑھانا ممکن نہیں ہے- خالد مشعل نے یہودی آبادکاری کے حوالے سے کہا کہ اسرائیلی ہٹ دھرمی کے خلاف مسلمانوں کا متحد ہونا ضروری ہے- اسرائیل کو پیغام دینا چاہیے کہ عرب ممالک کے پاس دیگر راستے بھی ہیں- غزہ سرحد پر مصر کی جانب سے زیر زمین فولادی دیوار کی تعمیر کے حوالے سے خالد مشعل نے کہا کہ انہیں امید ہے کہ مصری قیادت دیوار کی تعمیر کے متعلق اپنا فیصلہ تبدیل کردے گی- خالد مشعل نے واضح کیا کہ مصر کو غزہ سے کوئی خطرہ نہیں ہے- اصل خطرہ اسرائیل سے ہے وہ سب کا دشمن ہے-