غزہ – (مرکزاطلاعات فلسطین فاؤنڈیشن) غزہ کی پٹی میں سیز فائر اور جنگ بندی کے معاہدے کی مسلسل خلاف ورزیوں کے 175ویں روز بھی قابض اسرائیل کی افواج کی جانب سے وحشیانہ فائرنگ کے نتیجے میں متعدد شہری زخمی ہو گئے۔
ہمارے نامہ نگار نے اطلاع دی ہے کہ خان یونس کے علاقے مواصی میں قابض اسرائیل کی جنگی کشتیوں نے بے گھر فلسطینیوں کے خیموں پر براہ راست فائرنگ کی جس کے نتیجے میں کم از کم دو شہری زخمی ہو گئے۔ زخمیوں کو فوری طور پر کویت فیلڈ ہسپتال منتقل کر دیا گیا ہے۔
اسی دوران قابض اسرائیل کی بحری کشتیوں نے غزہ کی پٹی کے جنوبی شہر رفح کے ساحلی علاقوں پر بھی شدید فائرنگ کی۔
دوسری جانب قابض اسرائیل کے ٹینکوں نے خان یونس کے مشرقی علاقوں میں اندھادھند اور بھاری فائرنگ کی جبکہ آج علی الصبح پٹی کے شمالی حصے میں واقع جبالیا کیمپ پر بمباری کی گئی۔
قابض اسرائیل کے توپ خانے نے شہرِ غزہ کے مشرقی علاقوں کو نشانہ بنایا جبکہ قابض دشمن کی فوجی گاڑیوں کی جانب سے وقفے وقفے سے فائرنگ کا سلسلہ بھی جاری رہا۔
علاوہ ازیں پٹی کے وسطی علاقے میں واقع البريج کیمپ کے شمال مشرق میں قابض اسرائیل کی فوجی گاڑیوں نے شدید فائرنگ کر کے خوف و ہراس پھیلایا۔
قابض اسرائیل کی افواج گذشتہ 10 اکتوبر سے غزہ کی پٹی میں سیز فائر معاہدے اور تزویراتی سکون کی مسلسل خلاف ورزی کر رہی ہیں۔ ان مجرمانہ کارروائیوں میں توپ خانے اور فضائیہ کے ذریعے گولہ باری، فوجی گاڑیوں اور بحری جنگی کشتیوں سے فائرنگ کے ساتھ ساتھ پٹی کے مختلف علاقوں میں رہائشی عمارتوں اور شہری تنصیبات کو دھماکوں سے اڑانے کی سفاکیت شامل ہے۔
سیز فائر کی ان مسلسل خلاف ورزیوں کے نتیجے میں اب تک 714 شہری جام شہادت نوش کر چکے ہیں اور 1,940 دیگر زخمی ہوئے ہیں جبکہ اسی دوران ملبے کے نیچے سے 756 شہدا کے جسد خاکی نکالے گئے۔
وزارت صحت کے مطابق سات اکتوبر سنہ 2023ء سے شروع ہونے والی اس ہمہ گیر نسل کشی اور جارحیت کے آغاز سے اب تک شہدا کی مجموعی تعداد بڑھ کر 72,289 ہو گئی ہے جبکہ زخمیوں کی کل تعداد 172,040 تک جا پہنچی ہے۔
