بیروت (فلسطین نیوز۔مرکز اطلاعات) فلسطین فاؤنڈیشن پاکستان کا پانچ رکنی وفد لبنان کے دارالحکومت پہنچ گیا۔ وفد کی قیادت سابق رکن قومی اسمبلی و رہنما جماعت اسلامی مظفر ہاشمی اور رکن سندھ اسمبلی ایم کیو ایم پاکستان محفوظ یار خان کر رہے ہیں۔
فلسطین نیوز کو موصول ہونے والی اطلاعات کے مطابق وفد میں آئی ایس او پاکستان اور انجمن طلباء اسلام کے مرکزی صدور بھی شامل ہیں۔ فلسطین فاؤنڈیشن کے وفد کو بیروت ائیر پورٹ پر کانفرنس کے میزبان اعلی شخصیات اور علمائے کرام نے خوش آمدید کہا۔ دو روزہ بین الاقوامی فلسطین کانفرنس کا عنوان “القدس فلسطین کا ابدی دارالحکومت ہے”۔
فلسطین کانفرنس میں مفتی اعظم القدس سمیت دنیا کے 80 ممالک سے مندوبین شرکت کر رہے ہیں۔ کانفرنس کا مقاصد مسئلہ فلسطین کے حل کے لئے کوششوں کو تیز کرنا ہے۔ کانفرنس میں مقبوضہ فلسطین سے آنے والے فلسطینی نوجوانوں کی بڑی تعداد بھی شریک ہے۔
