فلسطینی سفیر کی طرف سے گولڈ اسٹون رپورٹ پر کارروائی رکوانے پر حماس کی مذمت

اسلامی تحریک مزاحمت “حماس” نے اقوام متحدہ میں فلسطینی اتھارٹی کے سفیر کی جانب سے غزہ جنگ سے متعلق اقوام متحدہ کی تیار کردہ گولڈ اسٹون رپورٹ پر کارروائی معطل کرانے پر فلسطینی اتھارٹی کو شدید تنقید کا نشانہ بنایا ہے. جمعرات کے روزحماس کے رہنما ڈاکٹر سامی ابو زھری نے ایک نیوز کانفرنس سے خطاب کرتے ہوئے کہا کہ فلسطینی اتھارٹی مفت میں قابض دشمن کی خدمت بجا لا رہی ہے. اقوام متحدہ میں انسانی حقوق کونسل کی تیار کردہ گولڈ اسٹون رپورٹ میں اسرائیل کو غزہ جنگ کے دوران سنگین جنگی جرائم کا مرتکب ٹھہرایا گیا ہے. جبکہ فلسطینی اتھارٹی اسرائیل کو قانون کے کٹہرے میں لانے سے بچانےکے لیے کوششیں کر رہی ہے. ایک سوال کے جواب میں ڈاکٹر ابوزھری کا کہنا تھا کہ فلسطینی اتھارٹی کی طرف سے گولڈ اسٹون کی رپورٹ پر کارروائی معطل کرانے کی سفارش کر کے غزہ جنگ کے زخمیوں پر نمک پاشی کی کوشش کی گئی ہے. فلسطینی عوام قابض دشمن اور اس کے ایجنٹوں کو اپنے خلاف کی جانے والی سازشوں کو جاری رکھنے کی اجازت نہیں دیں گے. انہوںنے فلسطینی صدر محمود عباس اور فتح سے مطالبہ کیا کہ وہ اسرائیل اور امریکا کی مرضی پر چلتے ہوئے قوم مخالف اقدامات سے باز آئیں.