فلسطینیوں سے اظہار یکجہتی اور یو م القدس کی مناسبت سے ملیر میں تصویری نمائش اور القدس کلچر شو کا انعقاد

سیکڑوں افراد کی شرکت، فلسطینیوں کی اخلاقی حمایت سمیت یوم القدس بھرپور انداز میں منانے کا عزم

کراچی( )فلسطین فاؤنڈیشن پاکستان کے زیر اہتمام کراچی کے علاقے ملیر میں ناد علی کے مقام پر فلسطینیوں کی جدوجہد آزادی کی حمایت اور رمضان المبارک میں یوم القدس کی مناسبت سے القدس کلچر شو اور تصویری نمائش کا اہتمام کیا گیا، واضح رہے کہ فلسطین فاؤنڈیشن پاکستان نے رمضان المبارک میں یوم القدس کی مناسبت سے ’’القدس امت اسلامی کا مرکز و محور‘‘ مہم کا آغاز کر دیا ہے جس سلسلے میں مختلف پروگرام ترتیب دئیے گئے ہیں تاہم فیڈرل بی ایریا میں لگائی جانے والی تصویری نمائش اور القدس شو بھی اسی مہم کا حصہ ہیں۔
فلسطین فاؤنڈیشن پاکستان کے تحت ملیرکراچی میں فلسطینی تاریخ اور جد وجہد آزادی پر لگائی جانے والی تصویری نمائش میں سیکڑوں افراد نے شرکت کی اور فلسطینیوں پر ڈھائے جانے والے صیہونی مظالم کی عکاسی کرتی ہوئی تصاویر کا معائنہ کیا، شرکاء میں خواتین اور بچوں سمیت نوجوانوں کی بڑی تعداد شامل تھی ،فلسطینیوں پر اسرائیلی مظالم کی تصویر کشی کرنے کے لئے لگائی گئی تصویری نمائش میں گذشتہ برس غزہ میں اکیاون روز تک جاری رہنے والی صیہونی جارحیت اور اس کے نتیجے میں ہونے والی تباہ کاریوں کی بھی عکاسی کی گئی تھی، اس موقع پر فلسطین فاؤنڈیشن پاکستان کی جانب سے عوام کی آگہی کے لئے تاریخ فلسطین پر مکمل دستاویزی فلم بھی چلائی گئی جبکہ بچوں کے لئے خصوصی طور پر ایک سی ڈی کا اجراء کیا گیا جس کا عنوان ’’کارٹون اچھے بھی ہوتے ہیں‘‘ تھا۔شرکائے تصویری نمائش نے اس عزم کا اظہار کیا کہ فلسطینیوں کی اخلاقی و سیاسی حمایت جاری رکھیں گے اور دنیا بھرکی طرح پاکستان کے شہر کراچی میں بھی یوم القدس کی ریلیوں اور جلوسوں میں بھرپور انداز میں شریک ہو کر عالمی استعماری قوتوں برطانیہ، امریکہ اور اس کی ناجائز اولاد اسرائیل کے خلاف بر سرپیکار ہو جائیں گے۔