برسبین – (مرکزاطلاعات فلسطین فاؤنڈیشن) فلسطین کے ساتھ اظہار یکجہتی کرنے والے سماجی کارکنوں نے آج آسٹریلیا کے شہر برسبین میں ویرا انجینئرنگ نامی اسلحہ ساز فیکٹری کے سامنے بھرپور احتجاجی مظاہرہ کیا جسے ایکیورس ایرو اسپیس کارپوریشن (Acurus Aerospace Corp) کے نام سے بھی جانا جاتا ہے۔ یہ احتجاج غزہ کی پٹی پر مسلط کردہ جنگ اور فلسطینیوں کے قتل عام میں اس کمپنی کے ملوث ہونے کے خلاف کیا گیا ہے۔
اس احتجاجی مہم کے منتظمین نے تفصیلات بتاتے ہوئے کہا کہ یہ مظاہرہ صبح سات بجے شروع ہوا اور دوپہر بارہ بجے تک جاری رہا جس کے نتیجے میں فیکٹری کے اندر فوجی پیداوار سے متعلقہ ساز و سامان کی ترسیل اور پرزہ جات کی تقسیم کا عمل مکمل طور پر ٹھپ ہو کر رہ گیا۔
فلسطین کے ساتھ اظہار یکجہتی کرنے والے کارکنوں نے آسٹریلیا کے شہر برسبین میں اسلحہ ساز فیکٹری ویرا انجینئرنگ کے سامنے احتجاج کیا تاکہ اس فیکٹری کے فلسطینیوں کی نسل کشی میں ملوث ہونے کو بے نقاب کیا جا سکے۔
اس مہم کے دوران احتجاج کا ایک نہایت متاثر کن اور منفرد انداز اپنایا گیا جہاں ایک گینڈے کا مجسمہ لایا گیا جو کہ ایک علامتی قدم تھا۔ اس کا مقصد عالمی برادری کی توجہ اس جانب مبذول کروانا اور مظاہرین کے ان مطالبات کو اجاگر کرنا تھا جن میں قابض اسرائیل سے وابستہ فوجی صنعتوں کی ہر قسم کی امداد اور تعاون بند کرنے پر زور دیا گیا ہے۔
سماجی کارکنوں نے اس عزم کا اعادہ کیا کہ یہ کارروائیاں مسلسل جاری رہنے والی مہمات کا حصہ ہیں اور انہوں نے اس حقیقت کی جانب اشارہ کیا کہ یہ ساتواں موقع ہے جب عوامی احتجاج کے ذریعے اس اسلحہ ساز فیکٹری کے کام کو کامیابی سے معطل کیا گیا ہے۔
عالمی سطح پر جوابدہی کا مطالبہ
مظاہرے میں شریک افراد نے اپنی احتجاجی لہر کو مزید وسعت دینے کے عزم کا اظہار کیا اور مطالبہ کیا کہ ان تمام اسلحہ ساز کمپنیوں کا کڑا محاسبہ کیا جائے جو ان کے بقول غزہ کی پٹی میں فلسطینیوں کے خلاف جاری فوجی کارروائیوں اور نسل کشی میں برابر کی شریک ہیں۔
انہوں نے مزید مطالبہ کیا کہ ان کمپنیوں کے ذمہ داران کے خلاف عالمی عدالتوں بالخصوص ہیگ میں واقع عالمی فوجداری عدالت میں مقدمات چلائے جائیں تاکہ ان ہولناک انسانی حقوق کی خلاف ورزیوں پر ان کا ٹرائل کیا جا سکے جو غزہ کی پٹی میں جاری صہیونی سفاکیت کا حصہ ہیں۔
