غزہ – (مرکزاطلاعات فلسطین فاؤنڈیشن) غزہ کی پٹی کی وزارت صحت نے آج پیر کے روز قابض اسرائیل کی جاری سفاکیت کے نتیجے میں گذشتہ چوبیس گھنٹوں کے دوران شہداء اور زخمیوں کی تعداد میں اضافے کا اعلان کیا ہے۔
وزارت نے اپنی روزانہ کی شماریاتی رپورٹ میں بتایا ہے کہ غزہ کی پٹی کے ہسپتالوں میں مزیدسات شہداء اور 17 زخمی لائے گئے ہیں، جس کے بعد 10 اکتوبر سے سیز فائر کے اعلان کے بعد سے اب تک شہداء کی مجموعی تعداد 723 ہو گئی ہے، جبکہ زخمیوں کی تعداد 1,990 تک جا پہنچی ہے، اس کے علاوہ ملبے سے نکالے گئے شہداء کے 759 کیسز بھی ریکارڈ کیے گئے ہیں۔
سات اکتوبر سنہ 2023ء سے شروع ہونے والی اس بدترین جارحیت کے مجموعی اعداد و شمار کے مطابق شہداء کی کل تعداد 72,302 ہو گئی ہے، جبکہ زخمیوں کی تعداد 172,090 تک پہنچ چکی ہے، جو کہ غزہ کی پٹی کی تاریخ کے خونریز ترین انسانی بحرانوں میں سے ایک ہے۔
رپورٹ میں اس اندوہناک حقیقت کی جانب بھی اشارہ کیا گیا ہے کہ متعدد متاثرین اب بھی ملبے تلے اور سڑکوں پر پڑے ہوئے ہیں، کیونکہ ایمبولینس اور شہری دفاع کا عملہ قابض دشمن کی رکاوٹوں کے باعث اب تک ان تک پہنچنے سے قاصر ہے، جو کہ انسانی امداد کی فراہمی کی صلاحیت میں شدید گراوٹ کا منہ بولتا ثبوت ہے۔
اسی تناظر میں وزارت نے ایک عمارت گرنے کے نتیجے میں ایک شہری کی شہادت بھی ریکارڈ کی ہے، جس کے بعد تباہ شدہ عمارتوں کے گرنے سے جاں بحق ہونے والوں کی تعداد 29 ہو گئی ہے، جو کہ تباہ شدہ انفراسٹرکچر کے باعث درپیش مسلسل خطرات کو ظاہر کرتا ہے۔
