غزہ – (مرکزاطلاعات فلسطین فاؤنڈیشن) غزہ کی پٹی کے جنوبی شہر خانیونس کے مغربی علاقے مواصی میں گذشتہ شب قابض اسرائیل کی سابقہ بمباری سے متاثرہ ایک عمارت کی دیوار گرنے کے نتیجے میں تین پناہ گزین فلسطینی شہید اور متعدد زخمی ہو گئے۔ یہ دیوار پناہ گزینوں کے خیموں پر گری، جو اس نئے خطرے کی عکاسی کرتا ہے جس کا سامنا ان ہزاروں خاندانوں کو ہے جنہوں نے دشمن کی وحشیانہ بمباری میں اپنے گھروں کی تباہی کے بعد مخدوش عمارتوں یا ان کے گرد و نواح میں پناہ لے رکھی ہے۔
خانیونس گورنری میں شہری دفاع کے عملے نے بتایا کہ انہوں نے الرباط کالج کی عمارت کی دیوار گرنے کے حادثے کے بعد امدادی کارروائیاں مکمل کر لی ہیں۔ یہ دیوار مواصی کے علاقے میں قائم پناہ گزینوں کے خیموں پر گری تھی، جس کے نتیجے میں تین شہری جام شہادت نوش کر گئے جبکہ متعدد دیگر مختلف نوعیت کے زخموں سے دوچار ہوئے ہیں۔
شہری دفاع کے مطابق اس المناک حادثے میں شہید ہونے والوں میں 65 سالہ انتصار عودہ ابو دان، 19 سالہ تسنیم ایاد بربخ اور 5 سالہ معصوم بچہ حسنی رافت حسنی ابو طہ شامل ہیں۔
یہ افسوسناک واقعہ غزہ کی پٹی کے مختلف علاقوں میں قابض اسرائیل کی بمباری سے متاثرہ عمارتوں کے گرنے کے بڑھتے ہوئے واقعات کا تسلسل ہے۔ محفوظ پناہ گاہوں کی عدم موجودگی کے باعث پناہ گزین خاندان تباہ شدہ عمارتوں کے قریب یا مخدوش تنصیبات کے اندر اپنے خیمے لگانے پر مجبور ہیں، جس سے جاری جنگ اور ملبہ ہٹانے یا مخدوش عمارتوں کو محفوظ بنانے کے لیے ضروری وسائل کی کمی کے باعث ان کی زندگیوں کو مزید خطرات لاحق ہو گئے ہیں۔
ماہرین اور امدادی ٹیموں نے متنبہ کیا ہے کہ بمباری سے جزوی طور پر متاثر ہونے والی سیکڑوں عمارتیں کسی بھی لمحے گر سکتی ہیں، خاص طور پر جب ان کے گرد و نواح کو پناہ گزینوں کے لیے استعمال کیا جا رہا ہو۔ ایسے حادثات غزہ کی پٹی میں انسانی جانوں کے ضیاع اور جاری نسل کشی کے المناک اعداد و شمار میں مزید اضافے کا باعث بن رہے ہیں۔
