غزہ سرحد پر فولادی باڑ امریکی مصری گٹھ جوڑ سے تعمیر کی جا رہی ہے: اقوام متحدہ

اقوام متحدہ کے فلسطینی اراضی میں انسانی حقوق کے نمائندہ خاص رچرڈ فولک نے غزہ سرحد پر مصری حفاظتی باڑ کی تعمیر کی مذمت کی ہے- انہوں نے اقوام متحدہ کے ریڈیو سے انٹرویو میں کہا کہ غزہ سرحد پر باڑ انتہائی افسوسناک امر ہے- یہ باڑ امریکی مصری گٹھ جوڑ سے تعمیر کی جا رہی ہے- امریکی انجینئر دیوار کی تعمیر میں حصہ لیں گے- دیوار کی تعمیر کا مقصد غزہ کے رہائشیوں کی سرنگوں کے ذریعے مصر سے غذائی مواد اور دیگر ضروریات زندگی کی اشیاء کی سمگلنگ روکنا ہے- اقوام متحدہ کے نمائندہ خاص نے کہا کہ سرنگوں کی تعمیر فلسطینیوں کی حالت ناامیدی کی عکاس ہے- دوسری جنگ عظیم کے بعد غزہ کی ناکہ بندی فلسطینیوں کے لیے مشکل ترین مرحلہ ہے- رچرڈ فولک نے غزہ کی ناکہ بندی کے خاتمے پر مجبور کرنے کے لیے اسرائیل پر اقتصادی پابندیاں عائد کرنے کا مطالبہ کیا- انہوں نے کہا کہ اسرائیلی حکام سفارتی زبان نہیں سمجھتے- اس لیے اسرائیل پر پابندیاں عائد کیا جانا ضروری ہے-