عباس ملیشیا کا کریک ڈاؤن جاری، حماس کے مزید 52 کارکن گرفتار

عباس ملیشیا کی جانب سے مغربی کنارے میں حماس کے خلاف کریک ڈاؤن مسلسل جاری رکھا ہوا ہے۔ رام اللہ کی غیر آئینی حکومت نے مغربی کنارے کے تمام اضلاع سے حماس کے مزید 52 رہنما اور کارکن حراست میں لے لیے، اس طرح پچھلے چار روز میں اغوا شدہ حماس کے کارکنوں کی تعداد 650 تک پہنچ گئی ہے۔ عباس ملیشیا کے تازہ آپریشن میں ضلع جنین سے 05، قلقیلیہ سے 03، نابلس سے 11، طولکرم سے 04، سلفیت سے 13، رام اللہ سے 09، الخلیل سے 05 اور بیت لحم سے 02 افراد کو اغوا کیا گیا۔ واضح رہے کہ اسرائیل اور رام اللہ حکومت کے مابین مذاکرات کے آغاز کے ساتھ ہی مغربی کنارے میں فلسطینی مزاحمتی دھڑوں نے اسرائیلی فوجیوں کے خلاف کارروائیاں تیز کر دی ہیں، چار روز قبل اسلامی تحریک مزاحمت ۔ حماس کے عسکری ونگ القسام بریگیڈ نے ایک دلیرانہ آپریشن میں 04 اسرائیلی فوجیوں کو جہنم واصل کیا، جس کے بعد عباس ملیشیا نے اسرائیلی فوج کے ساتھ سیکیورٹی تعاون کے نام پر پہلے سے جاری مزاحمت کاروں کے خلاف اپنا آپریشن تیز کر دیا ملیشیا چار روز کے قلیل عرصے میں اب تک حماس کے ساڑھے چھ سو کارکنوں کو اغوا کر چکی ہے۔ تاہم عباس ملیشیا کو تاحال الخلیل آپریشن کے مزاحمت کاروں کی گرفتاری میں کوئی کامیابی نہیں مل سکی۔ فلسطینی ذرائع کے مطابق عباس ملیشیا حماس کے گرفتار کارکنوں پر بہیمانہ تشدد کررہی ہے اور انہیں تفتیش کے دردناک مراحل سے گزارا جا رہا ہے۔