تہران – (مرکزاطلاعات فلسطین فاؤنڈیشن) ایرانی ہلال احمر نے پیر کے روز اعلان کیا ہے کہ اسرائیل اور امریکہ کی جاری مشترکہ فوجی کارروائی کے نتیجے میں جاں بحق افراد کی تعداد بڑھ کر 555 ہو گئی ہے۔
ایرانی ہلال احمر کے بیان کے مطابق گزشتہ دو روز کے دوران ہونے والے اسرائیلی-امریکی مشترکہ حملوں میں ایران بھر کے 131 رہائشی علاقوں کو نشانہ بنایا گیا۔ فارس نیوز ایجنسی کے مطابق تنظیم نے 555 ہلاکتوں کی تصدیق کی ہے، تاہم زخمیوں کی تازہ تعداد جاری نہیں کی گئی۔
اس سے قبل ہفتے کے روز جاری کردہ اعداد و شمار کے مطابق 201 افراد جاں بحق اور 747 زخمی ہوئے تھے۔
ہفتے کی صبح سے اسرائیل اور امریکہ ایران پر فوجی حملے کر رہے ہیں، جن کے نتیجے میں سینکڑوں افراد جاں بحق ہوئے، جن میں سپریم لیڈر آیت اللہ علی خامنہ ای اور اعلیٰ سیکیورٹی حکام بھی شامل ہیں۔
تہران نے اس کے جواب میں اسرائیل کی جانب میزائل اور ڈرون حملے کیے ہیں اور مختلف عرب ممالک میں امریکی اڈوں اور مفادات کو بھی نشانہ بنایا ہے۔ ان حملوں سے شہری تنصیبات، بندرگاہوں اور رہائشی عمارتوں کو نقصان پہنچنے اور جانی نقصان کی اطلاعات ہیں۔
یہ حملے ایسے وقت میں کیے گئے جب عمان کی ثالثی میں ایران اور امریکہ کے درمیان مذاکرات میں پیش رفت کی اطلاعات تھیں۔ یہ دوسرا موقع ہے جب اسرائیل نے جاری مذاکرات کو متاثر کیا، اس سے قبل جون 2025 کی جنگ کے دوران بھی ایسا ہوا تھا۔
جنیوا میں حالیہ مذاکرات کے دوران ایک ایرانی عہدیدار نے بتایا کہ تہران نے مسئلے کے حل کے لیے تکنیکی اور عملی تجاویز پیش کیں اور یقین دہانی کرائی کہ وہ جوہری ہتھیار حاصل کرنے کا ارادہ نہیں رکھتا۔ ایرانی مذاکرات کاروں نے یورینیم افزودگی کو خودمختار حق قرار دیتے ہوئے محدود مدت کے لیے عارضی معطلی کی پیشکش بھی کی۔
واشنگٹن اور تل ابیب ایران پر ایسے جوہری اور میزائل پروگرام جاری رکھنے کا الزام عائد کرتے ہیں جو اسرائیل اور خطے میں امریکہ کے اتحادی ممالک کے لیے خطرہ ہیں، جبکہ ایران اپنے جوہری پروگرام کو پُرامن قرار دیتے ہوئے جوہری ہتھیار بنانے کے ارادے کی تردید کرتا ہے۔
