مقبوضہ بیت المقدس (مرکز اطلاعات فلسطین فاؤنڈیشن ) قابض اسرائیل کو گذشتہ چند ماہ کے دوران اسلحے کے معاہدوں میں 600 ملین یورو سے زائد کا نقصان برداشت کرنا پڑا ہے اور خدشہ ہے کہ اربوں ڈالر مالیت کی مزید ڈیلز بھی ہاتھ سے نکل جائیں گی۔ یہ سب اس وقت ہو رہا ہے جب یورپ میں قابض اسرائیل کے خلاف سیاسی اور معاشی تنہائی کی لہر تیز تر ہو گئی ہے جس کی بڑی وجہ غزہ میں جاری نسل کشی اور قتل عام ہے۔
معاشی امور میں مہارت رکھنے والے صہیونی اخبار “کالکالیست” کے مطابق حال ہی میں اسپین نے اسرائیلی اسلحہ ساز کمپنی “رافائیل” کے ساتھ نیا معاہدہ منسوخ کیا، جس کے بعد گذشتہ چند ماہ میں منسوخ شدہ اسرائیلی اسلحہ جاتی سودوں کی مجموعی مالیت تقریباً 600 ملین یورو تک جا پہنچی۔
صرف تین روز قبل اسپین نے “رافائیل” کمپنی سے 207 ملین یورو مالیت کے اسلحے کی خریداری کا معاہدہ منسوخ کیا تھا۔ یہ گذشتہ چند ماہ میں تیسرا موقع ہے کہ میڈرڈ نے قابض اسرائیل کے ساتھ اسلحے کا سودا ختم کیا ہے۔ اس کی تفصیل صہیونی اخبار “ہارٹز” نے شائع کی۔
کالکالیست کے مطابق منسوخ کیے گئے معاہدوں میں فضائی رہنمائی کے نظام، اینٹی ٹینک اسپائیک میزائلوں کے ساتھ راکٹ لانچر اور “پولس” میزائلوں کی فراہمی کے سودے شامل ہیں۔
رپورٹ میں بتایا گیا کہ یہ اقدامات اسپین کے وزیر اعظم پیدرو سانچیز کی اُس پالیسی کا حصہ ہیں جس کا مقصد قابض اسرائیل پر دباؤ ڈالنا ہے تاکہ غزہ میں نسل کشی روکی جا سکے۔ اس پالیسی کے تحت اسپین نے نہ صرف اسرائیلی جنگی جہازوں اور ہتھیار بردار بحری جہازوں کو اپنی بندرگاہوں پر لنگرانداز ہونے سے روک دیا ہے بلکہ اسلحہ سازی میں استعمال ہونے والے اسٹریٹیجک خام مال کی برآمد پر بھی پابندی لگا دی ہے۔
اخبار کے مطابق قابض اسرائیل کی دفاعی صنعت نے خبردار کیا ہے کہ ان حالات میں مزید اربوں ڈالر کے معاہدے یورپی ممالک یا دیگر ریاستوں کے ساتھ منجمد یا منسوخ ہو سکتے ہیں، کیونکہ یورپ میں اسرائیلی درندگی کے خلاف سیاسی اور معاشی بائیکاٹ کی لہر مسلسل پھیل رہی ہے۔
