دنیا میں اسرائیل کی ساکھ گر رہی ہے، صہیونی سفارتکاروں کی تنبیہ

اسرائیلی فوجی ریڈیو نے اپنی تازہ رپورٹ میں کہا ہے کہ یورپی ممالک میں اسرائیلی سفارتکاروں نے اپنی حکومت کو متنبہ کیا ہے کہ 31 مئی کو غزہ آنے والے امدادی قافلے فلوٹیلا پر حملے کے بعد اسرائیلی ساکھ گرتی جا رہی ہے، دنیا کو بے تکے دلائل سے مزید بے وقوف نہیں بنایا جا سکتا۔
ریڈیو کے مطابق اسرائیلی سفارتکاروں نے اسرائیل کی تیزی سے بگڑتی ہوئی انتہائی خطرناک صورتحال سے خبردار کیا۔ سفیروں کے مطابق گولڈ اسٹون رپورٹ کے بعد بھی یہودی بستیوں کی تعمیر جاری رکھنے اور پھر فریڈم فلوٹیلا پر خونریزی نے مغربی اقوام کو اسرائیلی توجیہات کو سمجھنے سے قاصر کر دیا ہے۔
بیرون ممالک صہیونی نمائندوں نے ریڈیو سے بات چیت کرتے ہوئے کہا انہوں نے اس ضمن میں اسرائیلی حکومت کو جتنے بھی پیغامات ارسال کیے وہ حکومتی بے تکی توجیہات کے سامنے ناکام ہو گئے۔
اسرائیلی سفراء نے مغربی اقوام میں صہیونی ریاست کی ساکھ بحال کرنے کے لیے تجویز دیتے ہوئے کہا کہ فلسطینی صدر محمود عباس سے مذاکرات جاری رکھے جائیں تو حکومت کو لاحق خطرات کا بحران کافی حد تک ختم ہو جائے گا۔