دبئی میں محمود المبحوح کے قاتلوں نے آسٹریلیا کا پاسپورٹ استعمال کیا :آسٹریلوی پولیس

آسٹریلوی پولیس نے تصدیق کی ہے کہ دبئی میں اسلامی تحریک مزاحمت (حماس) کے رہنما محمود المبحوح کے قاتلوں نے آسٹریلیا کا پاسپورٹ استعمال کیا۔

کینبرا میں مقامی میڈیا سے بات کرتے ہوئے آسٹریلیا کے وزیر خارجہ اسٹیفن اسمتھ کا کہنا تھا کہ اسرائیلی ایجنٹوں کی جانب سے آسٹریلوی پاسپورٹس کے غلط استعمال کی تصدیق فیڈرل پولیس کی رپورٹ میں کی گئی ہے اوریہ رپورٹ موصول ہو گئی ہے مگر کسی بھی کارروائی سے پہلے آسٹریلوی انٹیلی جنس ایجنسیز سے کیس کی مزید چھان بین کروانا چاہتے ہیں۔

انہوں نے اس بات کی تردید کی کہ آسٹریلیا معاملے کی تحقیقات مکمل کرنے میں تاخیر کر رہا ہے۔ یاد رہے کہ اسلامی تحریک مزاحمت (حماس) کے سینئر رہنما محمود المبحوح کو جنوری میں مبینہ طور پر اسرائیلی ایجنٹوں نے دبئی میں قتل کر دیا تھا۔ قاتلوں نے مختلف یورپی ممالک کے پاسپورٹوں پر سفر کیا تھا اور ان میں آسٹریلیا کے چار پاسپورٹس کا بھی غلط استعمال ہوا تھا۔