خان یونس – (مرکزاطلاعات فلسطین فاؤنڈیشن) غزہ کی پٹی کے جنوبی شہر خان یونس میں منشیات کے انسداد کے شعبے نے اتوار کے روز اسمگل شدہ ادویات کی ایک بڑی کھیپ ضبط کر لی جو بلیک مارکیٹ میں فروخت کے لیے تیار کی گئی تھی۔ یہ وہ ادویات ہیں جن کی خرید و فروخت پر پابندی عائد ہے اور جنہیں وزارت صحت کی باضابطہ اجازت کے بغیر نہ درآمد کیا جا سکتا ہے اور نہ ہی فروخت ہے۔
خان یونس میں انسداد منشیات کے ڈائریکٹر نے ایک پریس بیان میں بتایا کہ محکمے کی ٹیموں کو اطلاعات موصول ہوئیں کہ بعض افراد قانونی اجازت ناموں کے بغیر ممنوعہ ادویات کی نمائش اور فروخت کر رہے ہیں، جس پر فوری طور پر فیلڈ میں کارروائی کی گئی تاکہ معلومات کی تصدیق کی جا سکے۔
انہوں نے بتایا کہ سکیورٹی فورس نے ان ادویات کی تشہیر میں ملوث تین افراد کو گرفتار کر لیا جبکہ ان کے قبضے سے موجود تمام مقدار بھی ضبط کر لی گئی۔
انہوں نے وضاحت کی کہ ضبط شدہ ادویات میں تقریباً 2 لاکھ 80 ہزار گولیاں شامل ہیں جو سخت نگرانی میں آنے والی اقسام سے تعلق رکھتی ہیں، جن میں نمایاں طور پر لاریكا، ٹراماڈول اور زالدیار شامل ہیں، اس کے علاوہ دیگر ایسی ادویات بھی ہیں جو صرف مستند طبی نسخے پر ہی فراہم کی جاتی ہیں کیونکہ ان کا غلط استعمال انسانی صحت کے لیے سنگین خطرات کا باعث بنتا ہے۔
انسداد منشیات کے ڈائریکٹر نے تصدیق کی کہ مشتبہ افراد کو ضبط شدہ ادویات کے ہمراہ پولیس کے تحقیقاتی انسپکٹر کے حوالے کر دیا گیا ہے تاکہ قانون کے مطابق ضروری قانونی کارروائی مکمل کی جا سکے۔
