بیروت – (مرکزاطلاعات فلسطین فاؤنڈیشن) لبنانی مزاحمتی تنظیم حزب اللہ نے قابض اسرائیل کی فوج کے متعدد مراکز، فوجی اڈوں اور عسکری صنعتوں کی تنصیبات پر میزائلوں اور ڈرونز سے سلسلہ وار حملے کرنے کا اعلان کیا ہے، جبکہ ان حملوں کے باعث شمالی فلسطین کی متعدد بستیوں میں خطرے کے سائرن گونج اٹھے۔
حزب اللہ نے اپنے ایک بیان میں واضح کیا کہ اس کے مجاہدین نے منگل کی صبح سے اب تک لگ بھگ 30 حملے کیے ہیں۔ تنظیم نے اس بات پر زور دیا کہ یہ کارروائیاں ان اسرائیلی فضائی حملوں کا جواب ہیں جن میں لبنان کے درجنوں شہروں اور بستیوں سمیت بیروت کے جنوبی مضافاتی علاقے (ضاحیہ) کو نشانہ بنایا گیا تھا۔
بیان میں اشارہ کیا گیا ہے کہ میزائلوں کے ذریعے جنوبی لبنان کی بستی عدیسہ کے گرد و نواح میں وادی العصافير، تلہ الحمامص، خیام حراستی مرکز کے مشرقی جانب اور خلہ المحافر کے علاقوں میں قابض اسرائیل کی افواج کے اجتماعات کو نشانہ بنایا گیا۔
حزب اللہ نے بحیرہ طبریہ کے مغرب میں واقع شمشون بیس پر خودکش ڈرونز کے ذریعے حملے کا اعلان کیا ہے۔ تنظیم کے مطابق یہ بیس کمانڈ سینٹر اور علاقائی ساز و سامان کی فراہمی کا اہم مرکز سمجھا جاتا ہے۔
مزاحمتی حملوں کا دائرہ کار المطلہ اور مسکاف عام کی بستیوں تک پھیل گیا، جبکہ عکا کے جنوب مشرق میں یوديفات نامی عسکری صنعت کی کمپنی اور حیفہ کے جنوب میں مشمار الکرمیل نامی میزائل ڈیفنس سائٹ کو بھی نشانہ بنایا گیا۔
حزب اللہ نے منگل کی علی الصبح یہ بھی اعلان کیا تھا کہ اس نے پہلی بار حیفہ شہر کے مشرق میں واقع تسیپوریت بیس پر ڈرونز کے ذریعے حملہ کیا ہے۔
دوسری جانب اسرائیلی ذرائع نے اطلاع دی ہے کہ لبنان سے میزائل داغے جانے کے بعد منگل کی شام شمالی فلسطین کی متعدد بستیوں میں خطرے کے سائرن بج اٹھے۔
قابض اسرائیل کی فوج نے ایک بیان میں کہا کہ کرمیئیل اور اس کے گرد و نواح کے علاقوں بشمول ہار حالوتس، البقيعہ، حرفیش، نحف اور بیت جان کی بستیوں میں قبل از وقت انذار کا نظام فعال کر دیا گیا تھا۔
عبرانی اخبار یدیعوت احرونوت کے مطابق گلیل کے علاقے کی طرف تقریباً 10 میزائل داغے گئے، جن میں سے کچھ کو فضا میں تباہ کر دیا گیا جبکہ دیگر کھلے علاقوں میں گرے۔
اخبار نے مزید بتایا کہ اسرائیلی فوج کی ہوم فرنٹ کمانڈ نے المطلہ شہر اور کرمیئیل کے علاقے میں الرٹ جاری کر دیا ہے۔
یہ پیش رفت ایک ایسے وقت میں سامنے آئی ہے جب ایران پر اسرائیلی و امریکی حملے کے بعد 2 مارچ سے محاذِ جنگ لبنان تک پھیل چکا ہے، جس کے جواب میں ایران نے تل ابیب اور خطے کے دیگر علاقوں پر میزائلوں کی برسات کی تھی۔
اسی تناظر میں قابض اسرائیل بیروت کے جنوبی مضافات اور جنوبی و مشرقی لبنان کے علاقوں پر فضائی حملے جاری رکھے ہوئے ہے، جبکہ 3 مارچ سے جنوبی لبنان میں زمینی دراندازی کا آغاز بھی کیا جا چکا ہے۔
لبنانی وزارتِ صحت کے اعداد و شمار کے مطابق، لبنان پر جاری اسرائیلی جارحیت کے نتیجے میں منگل تک 570 سے زائد افراد شہید اور 1444 زخمی ہو چکے ہیں، جن میں سینکڑوں بچے اور خواتین شامل ہیں۔ اس سفاکیت نے ایک بار پھر غاصب صہیونی ریاست کی فلسطینیوں اور لبنانیوں کے خلاف نسل کشی کی پالیسی کو بے نقاب کر دیا ہے۔
