جیل میں باسی کھانے سے فلسطینی قیدی زہر خورانی کا شکار ہو گئے

اسرائیلی حکام کی جانب سے زہریلا کھانا فراہم کرنے پر کئی فلسطینی قیدی بیمار ہو گئے۔ فلسطینی انجمن اسیران کے مطابق اسرائیلی جیل حوارہ میں موجود فلسطینی قیدیوں کو باسی ناشتہ دیا گیا جس کے باعث کئی افراد کے معدے میں‌ شدید درد شروع ہو گیا جبکہ بعض ہیضے کا شکار ہو گئے۔ قیدیوں نے اگلے روز جیل حکام کی جانب سے فراہم کردہ کھانا لینے سے انکار کر دیا ۔ان کا کہنا ہے کہ یہ کھانا بھی زہریلا اور باسی تھا جبکہ اس میں سے شدید قسم کی بدبو بھی آ رہی تھی ۔ فلسطینی قیدیوں نے انسانی حقوق کی تنظیموں پر زور دیا ہے کہ اسرائیلی حکام پر کھانے کا معیار بہتر کرنے کے لئے دباؤ ڈالا جائے۔ دوسری جانب اسرائیلی سپریم کورٹ نے فلسطینی شہری حنان البرغوثی کی جانب سے اپنے بھائی سے ملاقات کے لئے دائر کردہ درخواست مسترد کر دی ہے۔ حنان البرغوثی نے انیس سو اٹہتر سے اسرائیلی جیل میں‌ قید اپنے بھائی نیل البرغوثی سے ملاقات کرانے کی اپیل کی تھی ۔ سپریم کورٹ نے بعض خفیہ ثبوتوں کی بنا پر دونوں بھائیوں کو ملاقات کی اجازت دینے سے انکار کر دیا۔