جنوبی لبنان میں مزاحمت کا بھرپور ردعمل، دشمن کے متعدد فوجی ہلاک

تل ابیب – (مرکزاطلاعات فلسطین فاؤنڈیشن) قابض اسرائیل کی فوج نے آج منگل کے روز اعتراف کیا ہے کہ جنوبی لبنان میں حزب اللہ کے مجاہدین کے ساتھ جھڑپ کے دوران “ناحال” بریگیڈ کا ایک افسر اور تین فوجی ہلاک ہو گئے ہیں۔ شمالی محاذ پر کشیدگی کے آغاز سے اب تک ہونے والے ان شدید ترین مقابلوں میں مزید تین فوجی زخمی بھی ہوئے جن میں سے ایک کی حالت نازک بتائی جاتی ہے۔

فوجی بیان کے مطابق یہ جھڑپ پیر کی شام اس وقت شروع ہوئی جب فوجی گشتی دستوں نے بیت لیف نامی بستی کے قریب مسلح گروہوں کی موجودگی کا پتہ چلایا، جس کے بعد آمنے سامنے کا مقابلہ شروع ہو گیا اور دونوں جانب سے قریبی فاصلے سے شدید فائرنگ کا تبادلہ ہوا۔

بیان میں واضح کیا گیا کہ جھڑپ کے دوران متعدد فوجی زخمی ہوئے جنہیں نکالنے کی کارروائی شروع کی گئی، تاہم اسی دوران امدادی دستے کو ٹینک شکن میزائل سے نشانہ بنایا گیا جس کے نتیجے میں جانی نقصان میں اضافہ ہوا۔

دوسری جانب قابض اسرائیل کی افواج نے ٹینکوں اور فضائیہ کی مدد سے جوابی کارروائی کرتے ہوئے آپریشن کے گرد و نواح میں حزب اللہ کے ٹھکانوں پر شدید گولہ باری کی۔

اسرائیلی چینل 12 نے ایک فوجی ذریعے کے حوالے سے بتایا کہ یہ مقابلہ دست بدست تھا اور امدادی دستے کو ٹینک شکن میزائلوں سے نشانہ بنانے کی وجہ سے میدانی صورتحال مزید پیچیدہ ہو گئی۔

علاقائی کشیدگی کے اس تناظر میں لبنان پر جاری جارحیت کے آغاز سے اب تک قابض اسرائیل کی فوج کے لیے ہلاکتوں کے لحاظ سے یہ سب سے بڑا واقعہ قرار دیا جا رہا ہے۔

اسی دوران قابض اسرائیل کی فوج نے دعویٰ کیا ہے کہ اس نے لبنانی دارالحکومت بیروت میں 100 سے زائد ٹاورز پر فضائی حملے کیے ہیں، جن کے بارے میں اس کا دعویٰ ہے کہ انہیں حزب اللہ استعمال کر رہی تھی۔ نیز اسرائیل نے لبنان، غزہ، شام اور مغربی کنارے میں سرگرم فلسطینی دھڑوں اور حزب اللہ کے درمیان رابطہ کاری یونٹ کے اہم کمانڈروں کو نشانہ بنانے کا دعویٰ بھی کیا ہے۔

قابض اسرائیل کی فوج نے لبنان کے مختلف علاقوں میں حملے کیے اور دریائے زہرانی کے جنوب میں واقع قصبوں اور دیہات کو خالی کرنے کی وارننگ جاری کی ہے۔

دشمن نے دعویٰ کیا ہے کہ اس کی افواج نے ایسے گوداموں، زیر زمین ٹھکانوں اور ہیڈ کوارٹرز کو تباہ کیا ہے جہاں اسلحہ چھپایا گیا تھا اور جہاں سے اسرائیل کی طرف راکٹ داغے جاتے تھے۔ ان کا دعویٰ ہے کہ برآمد ہونے والے اسلحے میں حفاظتی جیکٹس، ہیلمٹ اور راکٹ سے چلنے والے گرنیڈ لانچر (آر پی جی) شامل ہیں۔

فوجی بیان میں مزید کہا گیا کہ اس علاقے میں کام کرنے والے آرٹلری یونٹس نے گذشتہ چند دنوں کے دوران جنوبی لبنان میں حزب اللہ کے اہداف پر 700 سے زائد گولے داغے ہیں۔

دوسری جانب حزب اللہ نے اپنے حملے جاری رکھتے ہوئے اعلان کیا ہے کہ اس نے ڈرون طیاروں اور گولوں کے ذریعے حیفہ، الکریوت، عکا اور طبریہ کے علاقوں میں اسرائیلی فوج کے ٹھکانوں اور مراکز کو نشانہ بنایا ہے۔ اسرائیلی رپورٹوں کے مطابق طبریہ کے قریب کھلے مقامات پر دو گولے گرے تاہم سائرن نہیں بجائے گئے۔

حزب اللہ نے پیر کے روز 40 مختلف آپریشنز کرنے کا اعلان کیا جن میں میزائل حملوں اور ڈرونز کے ذریعے اسرائیلی بستیوں، فوجی مراکز، اڈوں اور فوجی اجتماعات کو نشانہ بنایا گیا۔

قابض اسرائیل کی فوج نے اس سے قبل لبنان کے محاذ پر لڑائی کے آغاز سے اب تک اپنے 10 فوجیوں کی ہلاکت اور 16 کے زخمی ہونے کا اعلان کیا تھا، جبکہ میڈیا رپورٹس کے مطابق زخمیوں کی تعداد 60 سے زائد ہے جن میں سے اکثریت ٹینک شکن میزائلوں سے فوجی گاڑیوں کو نشانہ بنائے جانے کے نتیجے میں زخمی ہوئی۔

لبنان پر دومارچ سنہ 2026ءسے جاری اسرائیلی جارحیت کے نتیجے میں اب تک شہداء کی کل تعداد ایک ہزار 247 ہو گئی ہے جبکہ 3680 افراد زخمی ہوئے ہیں۔