جمعہ کے خطبات میں امیر قطر کو ملامت کرنے کی فتحاوی ہدایات جاری

قطر کے عرب ٹی وی چینل ’’الجزیرہ‘‘ کی جانب سے مغربی کنارے کی فلسطینی اتھارٹی کے اسرائیل کے ساتھ خفیہ معاہدوں کی دستاویز منظر عام پر لانے کے بعد فلسطنیی اتھارٹی کے مشتعل وزیر اوقاف ھباش نے خطباء کو ہدایت جاری کی ہے کہ وہ جمعۃ کے خطبات میں قطر اور امیر قطر کو ملامت کا نشانہ بنائیں۔ مغربی کنارے کے متعدد خطباء نے ’’مرکز اطلاعات فلسطین‘‘ کے نمائندے کو بتایا کہ سلام فیاض کی سربراہی میں ناجائز حکومت کے وزیر اوقاف محمود ھباش کی جانب سے ٹی وی چینل ’’الجزیرہ‘‘ اور امیر قطر شیخ حمد بن خلیفہ آل ثانی کو سب و شتم اور ملامت کا نشانہ بنائیں اور ان پر فتنہ پروری اور دروغ گوئی کر کے فلسطینی اتحاد پارہ پارہ کرنے کے الزامات بھی لگائے جائیں۔ واضح رہے کہ قطر کے خلاف مذمتی مہم چلانے سے پہلے قطری چینل ’’الجزیرہ‘‘ نے فلسطینی اتھارٹی اور اسرائیل کے مابین خفیہ معاہدوں پر مبنی 1600 خفیہ دستاویز جاری کرنے کا اعلان کیا ہے، خفیہ معلومات کے افشا کا یہ سلسلہ تین روز سے جاری ہے، جس سے اتھارٹی کو سخت ہزیمت کا سامنا ہے۔