جرمنی نے اخوان المسلمون کے ساتھ مذاکرات شروع کر دیے:جرمن اخبار

مصر میں عوامی انقلاب کے نتیجے میں صدر حسنی مبارک کے نظام کے زوال کے بڑھتے امکانات کے ساتھ ہی یورپ نے اپوزیشن کی سب سے بڑی اسلام پسند جماعت اخوان المسلمون کے ساتھ بات چیت کا آغاز کر دیا ہے.
جرمن اخبار”دیرشپیگل”نے ایک رپورٹ میں بتایا ہے کہ مصر میں جاری عوام احتجاج کی تحریک نے صدر حسنی مبارک کی حکومت کو لرزا کر رکھ دیا ہے. موجودہ حالات میں یورپی ممالک نے ملک کی سب سے بڑی مذہبی جماعت اخوان المسلمون کے ساتھ بات چیت کے دروازے کھولنے کا فیصلہ کیا ہے.اس ضمن میں سب سے پہلا قدم جرمن حکومت نے اٹھایا ہے.
اخبار لکھتا ہے کہ جرمن چانسلر نے اخوان المسلمون کی قیادت سے باضابط مذاکرات کا فیصلہ کر لیا ہے، جلد ہی اخوان کی اعلیٰ سطح کی قیادت سے کسی بھی یورپی ملک میں بات چیت کا عمل شروع ہو جائے گا.
رپورٹ میں کہا گیا ہے کہ یورپ ممکنہ طور پر مصر میں اقتدار کا حصہ بننے والی اسلام پسند جماعت کے بارے میں پالیسی پر نرمی کرنے میں مجبور ہے. جرمن حکومت کی جانب سے اخوان کے ساتھ مذاکرات کے بعد یورپ کے دیگر ممالک بھی جماعت کے ساتھ بات چیت کا عمل شروع کریں گے.
ادھر ایک دوسری پیش رفت کے مطابق جرمنی اور فرانس نے مصر کو معاہدے کے تحت فراہم کردہ دفاعی سازو سامان ہنگامی طور پر روک دیا ہے.یورپی میڈیا کے مطابق یورپی ملکوں کی جانب سے مصر کے موجودہ بحرانی حالات میں فوجی سازو سامان کی فراہمی کے بجائے خوراک کی فراہمی پر توجہ دی جا رہی ہے.